இதென்ன நாற்காலி விற்பனையா..? ஒவ்வொன்றாக தூக்கிய போலீசார்… உள்ளே காத்திருந்த அதிர்ச்சி… மிரள வைக்கும் வீடியோ..!!

பீகார் மாநிலத்தில் மதுவிலக்கு அமலில் உள்ள நிலையில், சட்டவிரோதமாக மதுவைக் கடத்த சமூக விரோதிகள் நாள்தோறும் புதிய யுக்திகளைக் கையாண்டு வருகின்றனர். அந்த வகையில், ஒரு நபர் தனது இருசக்கர வாகனத்தில் பிளாஸ்டிக் நாற்காலிகளை விற்பனை செய்வது போல நடித்து, அவற்றின் இடுக்குகளில் ரகசியமாக மது பாட்டில்களை அடுக்கி வைத்து கடத்தியுள்ளார். வெளியில் இருந்து பார்ப்பதற்கு சாதாரண வியாபாரி போலத் தெரிந்ததால், எவருக்கும் சந்தேகம் எழவில்லை.

இருப்பினும், அந்த நபரின் நடமாட்டத்தின் மீது சந்தேகம் கொண்ட காவல்துறையினர், அவரை வழிமறித்துச் சோதனை நடத்தினர். அப்போது, அவர் அடுக்கி வைத்திருந்த ஒவ்வொரு நாற்காலிக்கும் அடியில் உள்ள இடைவெளியில் பல்வேறு பிராண்டுகளைச் சேர்ந்த மது பாட்டில்கள் மிக லாவகமாக மறைத்து வைக்கப்பட்டிருந்ததைக் கண்டு காவல்துறையினரே அதிர்ச்சியில் உறைந்து போயினர். வியாபாரம் என்ற போர்வையில் அரங்கேறிய இந்த நூதன மோசடி அதிகாரிகளை வியப்பில் ஆழ்த்தியுள்ளது.

இது தொடர்பான வீடியோ தற்போது சமூக வலைதளங்களில் வெளியாகி வைரலாகி வருகிறது. சட்டத்தின் பிடியில் இருந்து தப்பிக்கக் கடத்தல்காரர்கள் இவ்வளவு நுணுக்கமாகத் திட்டமிடுவதைக் கண்டு பொதுமக்கள் திகைத்துப் போயுள்ளனர். இந்தச் சம்பவம் தொடர்பாக வழக்குப் பதிவு செய்துள்ள காவல்துறையினர், அந்த நபரைக் கைது செய்து அவரிடமிருந்த மது பாட்டில்களையும் வாகனத்தையும் பறிமுதல் செய்தனர்.