மனித வாழ்க்கையில் எல்லாமே பணம் என்றாகி விட்டது… நம்மை வேடிக்கை பார்க்க வைத்து விட்டார்கள் – விஜய் சேதுபதி பட இயக்குனர் வேதனை!

நடிகர் விஜய் சேதுபதி நடித்த தென்மேற்கு பருவக்காற்று தர்மதுரை படங்களை இயக்கியவர் சீனு ராமசாமி. விஷ்ணு விஷால் நடித்த நீர்ப்பறவை மற்றும் கோழிப்பண்ணை செல்லதுரை போன்ற படங்களையும் இயக்குனர் சீனு ராமசாமி டைரக்ட் செய்திருக்கிறார். சமீபத்தில் அந்தோணி என்ற படத்தின் இசை வெளியீட்டு விழாவில் இயக்குனர் சீனு ராமசாமி கலந்து கொண்டார். அப்போது அவர் பேசியதாவது, இலங்கையில் ஒரு சினிமா எடுத்து அந்த படத்தை தமிழ்நாட்டில் உள்ள தியேட்டர்களில் விநியோகம் செய்வது என்பது பெரிய விஷயம்.

ஒரு நாடு போருக்குப் பிறகு சிதைந்த பிறகு அந்த நாட்டில் வாழ்க்கை என்பது கேள்விக்குறிதான். குண்டு விழுந்த சத்தம் காதுகளில் ஒலித்துக் கொண்டே இருக்கும். எல்லா வகையிலும் அடக்கு முறையை சந்தித்து வரும் ஜனங்களின் குரல்தான் இந்த படம். எதையோ ஒன்றை மறைக்க எதையோ ஒன்றை பார்த்துக் கொண்டிருக்கிறோம். இதுதான் வாழ்க்கை என்றாகி விட்டது. மனித வாழ்க்கையில் எல்லாமே பணமாகி விட்டது.

பார்க்க வைக்கப்படும் கேட்க வைக்கப்படும் உலகத்தில் மக்கள் வாழ்கிறார்கள். நம்மை வேடிக்கை பார்க்க வைத்து விட்டார்கள். அப்படிப்பட்ட உலகத்தில் இலங்கை தமிழ் மக்களின் வாழ்க்கையை உயிரோட்டமாக இந்த படம் காட்சிப்படுத்தி இருப்பதை வாழ்த்துகிறேன் என்று இயக்குனர் சீனு ராமசாமி அந்த விழாவில் பேசியிருக்கிறார்.