ஆந்திராவில் ‘ஸ்கெட்ச்’.. சென்னையில் கைது…. சவுக்கு சங்கர் மீது பாய்ந்த குண்டர் சட்டம்… இனி ஓராண்டு வெளியே வர முடியாது…!

நிபந்தனை ஜாமீன் விதிகளை மீறி தலைமறைவாக இருந்த யூடியூப் பிரபலம் சவுக்கு சங்கர், ஆந்திராவில் வைத்து சென்னை போலீசாரால் அதிரடியாக கைது செய்யப்பட்டுள்ளார். கடந்த ஆண்டு டிசம்பரில் மோசடி வழக்குகளில் கைதாகி, பின்னர் உடல்நலக் குறைவால் 12 வார கால இடைக்கால ஜாமீனில் வெளிவந்த அவர், நீதிமன்ற உத்தரவுப்படி மார்ச் 25-ஆம் தேதி ஆஜராகத் தவறினார். இதனால் அவர் தலைமறைவானதாக அறிவிக்கப்பட்ட நிலையில், தனிப்படை போலீசார் தீவிர தேடுதல் வேட்டை நடத்தி அவரை ஆந்திராவிலுள்ள ஒரு விடுதியில் வைத்து மடக்கிப் பிடித்தனர்.

தற்போது சென்னை புழல் சிறையில் அடைக்கப்பட்டுள்ள சவுக்கு சங்கர் மீது தமிழக காவல்துறை ‘குண்டர் தடுப்பு சட்டத்தின்’ (Goondas Act) கீழ் நடவடிக்கை எடுத்துள்ளது. இதற்கான அதிகாரப்பூர்வ ஆணை சிறையிலேயே அவரிடம் வழங்கப்பட்டுள்ளது. தொடர்ச்சியாக தமிழக அரசு மற்றும் முதல்வர், துணை முதல்வர் உள்ளிட்ட முக்கிய தலைவர்கள் மீது கடுமையான விமர்சனங்களை முன்வைத்து வந்த நிலையில், இந்த சட்ட நடவடிக்கை அவர் மீது பாய்ந்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.

குண்டர் சட்டம் என்பது பொது அமைதிக்கு குந்தகம் விளைவிப்பவர்கள் மீது பாயும் ஒரு கடுமையான சட்டமாகும். இந்த சட்டத்தின் கீழ் ஒருவர் கைது செய்யப்பட்டால், பொதுவாக ஓராண்டு வரை ஜாமீனில் வெளியே வர முடியாது. இது சவுக்கு சங்கருக்கு பெரும் பின்னடைவாகக் கருதப்படுகிறது. ஏற்கெனவே அதிமுக பொதுச்செயலாளர் எடப்பாடி பழனிச்சாமிக்கு ஆதரவாகவும், ஆளுங்கட்சிக்கு எதிராகவும் கருத்துகளைப் பகிர்ந்து வந்த அவர், தற்போது சட்ட ரீதியாகப் பெரும் சிக்கலில் சிக்கியுள்ளார்.

இருப்பினும், சவுக்கு சங்கருக்கு சட்டப்பூர்வமான ஒரு வாய்ப்பு இன்னும் உள்ளது. குண்டர் சட்டத்தை எதிர்த்து அவர் உயர் நீதிமன்றத்தில் மனுத் தாக்கல் செய்ய முடியும். நீதிமன்றம் அந்த சட்ட நடவடிக்கையில் உள்ள குறைபாடுகளைக் கண்டறிந்து அதை ரத்து செய்தால் மட்டுமே, ஓராண்டு முடிவதற்கு முன்பே அவர் ஜாமீனில் வெளியே வர வாய்ப்புள்ளது. இல்லையெனில், அடுத்த ஒரு வருடத்திற்கு அவர் சிறையிலேயே இருக்க வேண்டிய சூழல் உருவாகியுள்ளது.