கட்சியை கடன் வாங்கிய சசிகலா..? “தென்னந்தோப்பு” சின்னத்தின் பின்னணியில் இருக்கும் ரகசியம்…. 10 ஆண்டு கால அரசியல் பிளாஷ் பேக் இதோ…!!

முன்னாள் முதல்வர் ஜெயலலிதாவின் மறைவிற்குப் பிறகு, அதிமுகவிலிருந்து ஓரங்கட்டப்பட்ட சசிகலா, தற்போது தனது அரசியல் இருப்பை உறுதிப்படுத்தும் வகையில் ‘அகில இந்திய புரட்சித் தலைவர் மக்கள் முன்னேற்ற கழகம்’ என்ற புதிய கட்சியை அறிவித்துள்ளார். சிறை மீண்ட பிறகு டிடிவி தினகரன் உள்ளிட்ட நம்பிக்கைக்குரியவர்கள் விலகிய நிலையில், பிப்ரவரி 14-ஆம் தேதி கமுதியில் கொடியை அறிமுகம் செய்தவர், தற்போது கட்சியின் பெயரையும் ‘தென்னந்தோப்பு’ சின்னத்தையும் அதிகாரப்பூர்வமாக வெளியிட்டுள்ளார். தேர்தல் ஆணையத்தில் முறைப்படி விண்ணப்பிக்காமலேயே இந்த அறிவிப்பு எப்படி சாத்தியமானது என்பது அரசியல் வட்டாரத்தில் பெரும் விவாதத்தைக் கிளப்பியுள்ளது.

இந்த அதிரடி அறிவிப்பின் பின்னணியில் ஒரு சுவாரசியமான அரசியல் பிளாஷ் பேக் ஒளிந்துள்ளது. மதுரையைச் சேர்ந்த எம்ஜிஆர் சிவ (எ) சக்கரவர்த்தி என்பவர், கடந்த 2016-17 காலப்பகுதியிலேயே இதே பெயரில் ஒரு கட்சியைப் பதிவு செய்து, ‘தென்னந்தோப்பு’ சின்னத்தையும் தேர்தல் ஆணையத்திடம் பெற்று வைத்திருந்தார். நீண்ட காலமாக முடங்கிக் கிடந்த அந்த அரசியல் கட்சியை மீட்டெடுத்த சசிகலா, சக்கரவர்த்தியுடன் நடத்திய பேச்சுவார்த்தையின் அடிப்படையில், ஏற்கனவே பதிவு செய்யப்பட்ட அதே பெயரையும் சின்னத்தையும் தனது அரசியல் பயணத்திற்காகப் பயன்படுத்திக் கொள்ள முடிவெடுத்துள்ளார்.

இருப்பினும், தொண்டர்களைக் கவரும் வகையில் கட்சியின் கொடியில் மட்டும் சில முக்கிய மாற்றங்களைச் சசிகலா செய்துள்ளார். சக்கரவர்த்தி முன்பு பதிவு செய்திருந்த கொடியில் இருந்த நீல நிறம் மற்றும் எம்ஜிஆர் படத்தை நீக்கிவிட்டு, அதிமுகவின் அடையாளமான கருப்பு, வெள்ளை, சிவப்பு நிறங்களுக்கு முக்கியத்துவம் அளித்துள்ளார். அண்ணா, எம்ஜிஆர் மற்றும் ஜெயலலிதா ஆகிய மூவரின் படங்களும் இடம்பெறும் வகையில் மாற்றப்பட்ட இந்தக் கொடி, அதிமுகவின் உண்மையான வாரிசு தாம்தான் என்பதைக் காட்டும் முயற்சியாகப் பார்க்கப்படுகிறது.