கல்லைக் கூட நடிக்க வைப்பார் என பெயரெடுத்தவர்… ஆனா விஜய்யை அறிமுகப்படுத்த மறுத்த பாரதிராஜா.. SAC பகிர்ந்த சீக்ரெட்..

தமிழ் சினிமாவின் போக்கை மாற்றிய ஒரு சில இயக்குனர்களில் பாரதிராஜாவும் ஒருவர். அவர் இயக்கத்தில் வெளியான 16 வயதினிலே திரைப்படம் தமிழ் சினிமாவையே புரட்டி போட்டது. தொடர்ந்து ரத்தமும் சதையுமான கிராமிய மணம் கொண்ட படங்களை கொடுத்து தமிழ் சினிமா ரசிகர்களின் இதயங்களைக் கொள்ளை கொண்டார்.

இயக்குனர் இமயம் என புகழப்படும், சினிமாவில் இயக்குனர் ஆவதற்கு முன் தமிழக அரசின் மலேரியா ஒழிப்பு பிரிவில் இன்ஸ்பெக்டராக பணிபுரிந்தவர். அந்த காலத்தில் மாதம் ரூ.75 என்ற பெரிய சம்பளத்தை வேண்டாம் என மறுத்துவிட்டு, சினிமா நடிகனாகும் ஆசையில், தனது அம்மா கந்துவட்டிக்கு கடன் வாங்கி கொடுத்த 300 ரூபாயுடன் பல ஆண்டு போராட்டத்துக்கு பின்னர் இயக்குனர் ஆனார்.

அவர் இயக்குனர் ஆனதும் முன்னணி நடிகர்களை தேடி செல்லாமல் புதுமுக நடிகர்களையே பெரும்பாலும் பயன்படுத்தினார்.  அதுமட்டுமில்லாமல அவர்களை நட்சத்திரங்களாக உருவாக்கினார். அவர் அறிமுகப்படுத்திய ராதா, ரேவதி, ராதிகா, ரேகா உள்ளிட்ட நடிகைகள் தமிழ் சினிமாவில் திறமையான நடிகைகள் என பெயரெடுத்தனர்.

பாரதிராஜாவிடம் ஒரு கல்லைக் கொடுத்தால் கூட நடிக்கவைத்துவிடுவார் என தமிழ் சினிமாக்காரர்கள் அவரை புகழ்ந்தனர். அதனால் தன்னுடைய மகன் விஜய்யை நடிகராக்க வேண்டும் என இயக்குனர் எஸ் ஏ சந்திரசேகர் முடிவு செய்ததும், அவரை முதலில் பாரதிராஜாவிடம்தான் அழைத்து சென்றாராம்.

அப்போது அவரிடம் “என் மகனை உங்கள் இயக்கத்தில் அறிமுகப்படுத்தவேண்டும்” எனக் கூறியுள்ளார். ஆனால் பாரதிராஜா அதை மறுத்துவிட்டாராம். எஸ் ஏ சியிடம் “நீங்களே பெரிய இயக்குனர். நீங்களே அறிமுகப்படுத்துங்கள்” என சொல்லிவிட்டாராம். இதை பல ஆண்டுகளுக்குப் பிறகு எஸ் ஏ சி ஒரு விழா மேடையில் பகிர்ந்துள்ளார்.

அதன் பிறகு  விஜய் எஸ் ஏ சி இயக்கத்தில் நாளைய தீர்ப்பு படத்தில் அறிமுகமாகி தொடர்ந்து தோல்வி படங்களாக கொடுத்து பூவே உனக்காக திரைப்படம் மூலமாக திருப்புமுனை பெற்று இன்று தமிழ் சினிமாவின் வசூல் மன்னர்களில் ஒருவராக திகழ்கிறார்.