“நாங்கள் விடமாட்டோம்”…. போர் நிறுத்தம் வந்தும் அடங்காத இஸ்ரேல்…ஈரானுக்கு நெதன்யாகு கொடுத்த பகிரங்க எச்சரிக்கை – நடுங்கும் மத்திய கிழக்கு நாடுகள்…!

மத்திய கிழக்கில் மீண்டும் போர் மேகங்கள் சூழத் தொடங்கியுள்ளன. ஈரான் மற்றும் அமெரிக்கா-இஸ்ரேல் கூட்டணிக்கு இடையே எட்டப்பட்ட தற்காலிக போர் நிறுத்தம், தற்போது பெரும் கேள்விக்குறியாகி உள்ளது. ஈரானின் அணு ஆயுதத் திட்டங்களுக்கு எதிராக அமெரிக்காவும் இஸ்ரேலும் நடத்திய தாக்குதலில் அந்நாட்டின் உச்ச தலைவர் கமேனி கொல்லப்பட்டதைத் தொடர்ந்து, போர் உச்சகட்டத்தை எட்டியது. ஒரு மாத கால மோதலுக்குப் பிறகு, ஹார்முஸ் ஜலசந்தியை ஈரான் மூடியதால் ஏற்பட்ட சர்வதேச எரிபொருள் நெருக்கடியைத் தொடர்ந்து, அமெரிக்க அதிபர் டிரம்ப்பின் எச்சரிக்கையை அடுத்து ஒரு சுணக்கமான போர் நிறுத்தம் அமலுக்கு வந்தது.

இந்த போர் நிறுத்த ஒப்பந்தத்தின் கீழ், ஈரான் மீது இரண்டு வாரங்களுக்குத் தாக்குதல் நடத்தப்படாது என அறிவிக்கப்பட்டாலும், ஈரானின் 10 அம்ச நிபந்தனைகள் மேற்கத்திய நாடுகளுக்குப் பெரும் சவாலாகவே உள்ளன. குறிப்பாக, தங்களுக்கு எதிரான பொருளாதாரத் தடைகளை நீக்க வேண்டும் மற்றும் வளைகுடா பிராந்தியத்திலிருந்து அமெரிக்கப் படைகள் வெளியேற வேண்டும் என்ற ஈரானின் பிடிவாதம், இந்த அமைதி ஒப்பந்தம் எவ்வளவு காலம் நீடிக்கும் என்ற சந்தேகத்தை சர்வதேச அரங்கில் ஏற்படுத்தியுள்ளது.

இந்நிலையில், இஸ்ரேல் பிரதமர் பெஞ்சமின் நெதன்யாகுவின் சமீபத்திய அறிவிப்பு எரிகிற தீயில் எண்ணெய் ஊற்றுவது போல் அமைந்துள்ளது. போர் நிறுத்த நிபந்தனைகளில் லெபனானில் உள்ள ஹிஸ்புல்லா அமைப்பு மீதான தாக்குதலைத் தவிர்க்கும் அம்சம் எதுவும் இல்லை என்று அவர் சுட்டிக்காட்டியுள்ளார். இதன் காரணமாக, லெபனான் எல்லைக்குள் ஹிஸ்புல்லாக்களை இலக்கு வைத்து இஸ்ரேலிய ராணுவம் தொடர்ந்து தாக்குதல் நடத்தும் என்று அவர் திட்டவட்டமாகத் தெரிவித்துள்ளார்.

நெதன்யாகுவின் இந்த நிலைப்பாட்டிற்கு ஈரான் கடும் கண்டனம் தெரிவித்துள்ளது. லெபனான் மீதான இஸ்ரேலின் தாக்குதல் தொடர்ந்தால், போர் நிறுத்த ஒப்பந்தத்திலிருந்து தாங்கள் வெளியேறத் தயங்கப் போவதில்லை என்று ஈரான் எச்சரித்துள்ளது. இதனால், தற்காலிகமாக ஓய்ந்திருந்த போர் மீண்டும் விஸ்வரூபம் எடுக்கும் அபாயம் ஏற்பட்டுள்ளது. இஸ்ரேலின் இந்த விடாப்பிடியான செயல்பாடுகளால் மத்திய கிழக்கில் அமைதி என்பது எட்டாக்கனியாகி, பதற்றம் மேலும் அதிகரிக்க வாய்ப்புள்ளதாக சர்வதேச அரசியல் நோக்கர்கள் ஆழ்ந்த கவலை தெரிவித்துள்ளனர்.