மாற்றுத்திறனாளிகளுக்கு ‘மாஸ்’ நியூஸ் சொன்ன தமிழக அரசு… “ரேஷன் பொருட்கள் இனி வீடு தேடி வரும்…!!”

தமிழக அரசின் தாயுமானவர் திட்டத்தின் கீழ், வரும் ஜூலை 4 மற்றும் 6 ஆகிய தேதிகளில் முதியோர் மற்றும் மாற்றுத்திறனாளிகளின் இல்லங்களுக்கே நேரடியாகச் சென்று பொது விநியோகத் திட்டப் பொருட்கள் விநியோகம் செய்யப்பட உள்ளதாக அறிவிக்கப்பட்டுள்ளது. 65 வயதிற்கு மேற்பட்ட முதியவர்கள் மற்றும் மாற்றுத்திறனாளிகள் தங்களின் அத்தியாவசியப் பொருட்களைச் சிரமமின்றிப் பெறும் வகையில் இந்தச் சிறப்பான நடவடிக்கை மேற்கொள்ளப்பட்டு வருகிறது.

இத்திட்டத்தின் கீழ், சென்னை மற்றும் அதன் சுற்றுவட்டாரப் பகுதிகளில் உள்ள 18 மண்டலங்களில் இந்த இல்லம் தேடி விநியோகிக்கும் சேவை செயல்படுத்தப்பட உள்ளது. இதில் அண்ணாநகர், ஆலந்தூர், பெருங்குடி, சோழிங்கநல்லூர், தேனாம்பேட்டை, அடையாறு, திருவொற்றியூர், மணலி, மாதவரம், தண்டையார்பேட்டை, ராயபுரம், திரு.வி.க.நகர், அம்பத்தூர், கோடம்பாக்கம், வளசரவாக்கம், பல்லாவரம், குரோம்பேட்டை மற்றும் தாம்பரம் ஆகிய பகுதிகள் அடங்கும்.

குறிப்பிடப்பட்டுள்ள இந்த மண்டலங்களில் கூட்டுறவுத் துறையின் கீழ் செயல்பட்டு வரும் 990 நியாயவிலைக் கடைகளின் விற்பனையாளர்கள், பயனாளிகளின் வீடுகளுக்கே சென்று அத்தியாவசியப் பொருட்களை வழங்க உத்தரவிடப்பட்டுள்ளது. எனவே, முதலமைச்சரின் இத்தாயுமானவர் திட்டத்தின் கீழ் பயன்பெறும் தகுதியுடைய முதியோர்களும் மாற்றுத்திறனாளிகளும் இந்த நல்வாய்ப்பைத் தவறாமல் பயன்படுத்திக் கொள்ள வேண்டும் எனத் தமிழக அரசு கேட்டுக் கொண்டுள்ளது.