“விஜய் கிட்டயும் பருப்பு வேகல… அதிமுகவிலும் இடமில்லை”… ராமதாஸின் அரசியல் வாழ்வு அவ்வளவுதானா?”…. தைலாபுரத்தில் அவசர ஆலோசனை….!

தமிழக அரசியல் களத்தில் பாட்டாளி மக்கள் கட்சிக்குள் வெடித்துள்ள தந்தை – மகன் மோதல், தற்போது புதிய திருப்பத்தை எட்டியுள்ளது. தேர்தல் ஆணையம் மற்றும் நீதிமன்ற உத்தரவுகளின்படி, பாமகவின் அதிகாரப்பூர்வமான கட்டுப்பாடும், சின்னமும் அன்புமணி ராமதாஸ் வசமாகியுள்ளது. இதனால் அதிருப்தியடைந்த டாக்டர் ராமதாஸ், தனது ஆதரவாளர்களுடன் இணைந்து ‘அய்யா பாட்டாளி மக்கள் கட்சி’ என்ற புதிய அமைப்பைத் தொடங்கி, தேர்தல் அரசியலில் தனது இருப்பைத் தக்கவைத்துக் கொள்ளப் போராடி வருகிறார்.

தற்போதைய அரசியல் சூழலில் அன்புமணி ராமதாஸ் அதிமுகவுடன் கூட்டணி அமைத்து, 15 முதல் 20 தொகுதிகள் வரை ஒதுக்கீடு பெறும் நிலையை எட்டியுள்ளார். மறுபுறம், டாக்டர் ராமதாஸின் புதிய கட்சிக்கு திமுக, அதிமுக அல்லது தமிழக வெற்றி கழகம் என எந்தப் பெரிய கட்சியும் இதுவரை சிவப்புக் கம்பளம் விரித்து வரவேற்கவில்லை. குறிப்பாக, அதிமுக பக்கம் சென்றால் மகனுடனும், திமுக பக்கம் சென்றால் திருமாவளவனுடனும் மோதல் ஏற்படும் என்பதால் ராமதாஸ் தரப்பு பெரும் தர்மசங்கடத்தில் ஆழ்ந்துள்ளது.

தன்னைத் தேடி கட்சிகள் வந்த காலம் மாறி, தற்போது கூட்டணிக்காகத் தேடிச் செல்ல வேண்டிய நிலைக்குத் தள்ளப்பட்டுள்ளதை உணர்ந்த ராமதாஸ், மீண்டும் திமுக மற்றும் அதிமுக ஆகிய இரு திராவிடக் கட்சிகளின் கதவுகளையும் தட்டத் தொடங்கியுள்ளார். இதற்காக ராமதாஸின் தீவிர ஆதரவாளரான அருள் என்பவர், முதலமைச்சர் மு.க.ஸ்டாலின் மற்றும் அதிமுக பொதுச்செயலாளர் எடப்பாடி பழனிசாமி ஆகியோரைச் சந்தித்துப் பேசியுள்ளதாகத் தகவல்கள் கசிகின்றன.

இருப்பினும், டாக்டர் ராமதாஸின் இந்தத் தூது முயற்சிகளுக்கு திமுக மற்றும் அதிமுக ஆகிய இரு தரப்பிலிருந்தும் இதுவரை சாதகமான பதில்கள் எதுவும் வரவில்லை என்று கூறப்படுகிறது. மகன் ஒருபுறம் அதிமுக கூட்டணியில் பலமாகத் தடம் பதித்துள்ள நிலையில், தந்தை ராமதாஸின் அடுத்தகட்ட அரசியல் நகர்வு மற்றும் அவருக்குக் கிடைக்கப்போகும் இடத்தைப் பொறுத்தே வன்னியர் வாக்கு வங்கியின் திசை அமையும் என அரசியல் விமர்சகர்கள் கருதுகின்றனர்.