“இங்க உட்கார கூடாது… உங்க சீட்ல உட்காருங்க”… மேடையிலேயே பாஜக அமைச்சரை எச்சரித்த மன்சுக் மாண்டவியா…. மோடி முன்னிலையில் நடந்த சம்பவம்….!

புதுச்சேரி லாஸ்பேட்டை ஹெலிமேடு மைதானத்தில் நடைபெற்ற அரசு நலத்திட்டங்கள் தொடக்க விழாவில் பிரதமர் நரேந்திர மோடி கலந்துகொண்டார். இந்த விழாவில் புதுச்சேரி ஆளுநர் கைலாஷ்நாதன், முதலமைச்சர் ரங்கசாமி மற்றும் அமைச்சர்கள் பலரும் பங்கேற்றனர். விழாவிற்கு வருகை தந்த பிரதமருக்கு உற்சாக வரவேற்பு அளிக்கப்பட்டதைத் தொடர்ந்து, பல்வேறு புதிய திட்டங்கள் தொடங்கி வைக்கப்பட்டன.

நிகழ்ச்சியின் போது இருக்கை ஒதுக்கீடு தொடர்பாக ஒரு சர்ச்சை ஏற்பட்டது. அமைச்சர் நமச்சிவாயம் வரவேற்புரை ஆற்றச் சென்றபோது காலியாக இருந்த அவரது இருக்கையில், பாஜக அமைச்சரான ஜான்குமார் அமர்ந்தார். இதைக் கவனித்த மத்திய அமைச்சர் மன்சுக் மாண்டவியா, ஜான்குமாரை அங்கிருந்து எழுந்து தனது சொந்த இருக்கைக்குச் செல்லுமாறு அறிவுறுத்தினார். அமைச்சரின் இந்தச் செயல் அங்கிருந்தவர்களிடையே பெரும் பேசுபொருளாக மாறியது.

மேலும், பிரதமரின் பாதுகாப்பு கருதி கருப்பு நிற உடை அணிந்து வந்த பொதுமக்களைப் பாதுகாப்புப் படையினர் விழா அரங்கிற்குள் அனுமதிக்காமல் வெளியேற்றினர். ஆனால், அதே வேளையில் அரங்கிற்குள் இருந்த சில அரசு அதிகாரிகள் கருப்பு உடை அணிந்திருந்தனர். சாதாரண மக்களுக்கு ஒரு நீதி, அதிகாரிகளுக்கு ஒரு நீதியா எனப் பொதுமக்கள் மற்றும் சமூக ஆர்வலர்கள் இந்த இரட்டை நிலைக்குக் கண்டனம் தெரிவித்துள்ளனர்.