“ஆமா அது உண்மைதான்”… ஆதாரத்துடன் களம் இறங்கிய பிரேமலதா… சீக்ரெட்டை போட்டுடைத்த எடப்பாடி… தமிழக அரசியலில் அதிரடி திருப்பம்…!

தமிழக சட்டமன்றத் தேர்தல் நெருங்கும் வேளையில், அதிமுக மற்றும் தேமுதிக இடையேயான “ராஜ்யசபா சீட்” சர்ச்சை புதிய உச்சத்தை எட்டியுள்ளது. 2024 மக்களவைத் தேர்தலின் போது தேமுதிகவுக்கு ஒரு ராஜ்யசபா சீட் தருவதாக ஒப்பந்தம் போடப்பட்டதை அதிமுக பொதுச் செயலாளர் எடப்பாடி பழனிசாமி முன்னதாக மறுத்திருந்தார். இதற்குப் பதிலடி கொடுக்கும் வகையில், திருவண்ணாமலையில் செய்தியாளர்களைச் சந்தித்த பிரேமலதா விஜயகாந்த், எடப்பாடி பழனிசாமி கையெழுத்திட்ட அந்த ரகசிய ஒப்பந்த ஆவணத்தை ஆதாரமாக வெளியிட்டார். “அரசியல் நாகரிகம் கருதி இதுவரை அமைதி காத்தோம், ஆனால் பழனிசாமி வரம்பு மீறிப் பேசுவதால் இந்த ஆதாரத்தை வெளியிட வேண்டிய நிலைக்குத் தள்ளப்பட்டுள்ளோம்” என்று அவர் ஆவேசமாகத் தெரிவித்தார்.

அந்த ஒப்பந்த ஆவணத்தில் 5 மக்களவைத் தொகுதிகளுடன் ஒரு மாநிலங்களவை (ராஜ்யசபா) இடமும் தேமுதிகவுக்கு ஒதுக்கப்படும் எனத் தெளிவாகக் குறிப்பிடப்பட்டுள்ளது. 2025-ம் ஆண்டிலேயே இந்த இடத்தைத் தருவதாக எடப்பாடி பழனிசாமி வாய்மொழியாக உறுதியளித்ததாகவும், “எம்ஜிஆர், ஜெயலலிதா காலத்திலிருந்தே ஒப்பந்தத்தில் ஆண்டு குறிப்பிடும் வழக்கம் இல்லை, என் வார்த்தையை நம்புங்கள்” என்று அவர் கூறியதாகவும் பிரேமலதா குற்றம் சாட்டினார். ஆனால், தற்போது தேமுதிக கூட்டணி மாறியதைக் காரணம் காட்டி, அந்த வாக்குறுதியை நிறைவேற்றாமல் பழனிசாமி ஏமாற்றிவிட்டதாகத் தேமுதிக தரப்பு கடும் அதிருப்தியை வெளிப்படுத்தியுள்ளது.

இதற்கிடையில், சேலத்தில் செய்தியாளர்களைச் சந்தித்த எடப்பாடி பழனிசாமி, தேமுதிகவின் வாக்கு வங்கி வெறும் 0.5 சதவீதம் மட்டுமே என்று கடுமையாக விமர்சித்தார். “அரை சதவீத வாக்கு வைத்துள்ள தேமுதிகவுக்கு திமுக கூட்டணியில் 10 தொகுதிகள் ஒதுக்கப்பட்டது ஆச்சரியமாக உள்ளது; நீண்டகாலமாக கூட்டணியில் இருக்கும் விசிக மற்றும் கம்யூனிஸ்ட் கட்சிகளை விட இவர்களுக்கு ஏன் இவ்வளவு முக்கியத்துவம்?” என அவர் கேள்வி எழுப்பினார். மேலும், 2026-ல் தான் சீட் தருவதாகக் கூறினோம் என்றும், அவர்கள் கூட்டணி மாறியதால்தான் அந்த வாக்குறுதி ரத்து செய்யப்பட்டதாகவும் தனது தரப்பு விளக்கத்தை அளித்தார்.

இந்த விமர்சனங்களுக்குப் பதிலடி கொடுத்த பிரேமலதா, 2011-ல் தேமுதிக ஆதரவு இருந்ததால்தான் அதிமுக ஆட்சியைப் பிடித்தது என்பதை நினைவூட்டினார். தற்போது திமுக கூட்டணியில் தேமுதிகவுக்கு 10 சட்டமன்றத் தொகுதிகளும் ஒரு ராஜ்யசபா சீட்டும் உறுதி செய்யப்பட்டு, அதன்படி எல்.கே. சுதீஷ் எம்பியாகப் பதவி வகித்து வருகிறார். கடந்த பத்து ஆண்டுகளாக ஒரு தொகுதியில் கூட வெற்றி பெறாத தேமுதிகவுக்கு திமுக இவ்வளவு முக்கியத்துவம் அளிப்பது அரசியல் வட்டாரத்தில் விவாதங்களைக் கிளப்பியுள்ள நிலையில், அதிமுக – தேமுதிக இடையேயான இந்த “ஒப்பந்த யுத்தம்” தேர்தல் களத்தில் பெரும் பரபரப்பை ஏற்படுத்தியுள்ளது.