மீண்டும் ஒர்க் ஃப்ரம் ஹோம்! பிரதமர் மோடியின் அதிரடி அட்வைஸ்.. “எங்க மேனேஜர் கிட்ட நீங்களே சொல்லிடுங்க” கதறும் நெட்டிசன்கள்..!!

இந்தியாவின் தொழிலாளர் மற்றும் வேலைவாய்ப்பு அமைச்சகத்தின் மாநாட்டில் பேசிய பிரதமர் மோடி, எதிர்கால சவால்களை எதிர்கொள்ள ‘வீட்டிலிருந்தே வேலை’ செய்யும் முறையை ஊக்குவிக்க வேண்டியதன் அவசியத்தை வலியுறுத்தினார். இது போக்குவரத்து நேரத்தை மிச்சப்படுத்துவதோடு மட்டுமல்லாமல், குறிப்பாக பெண்கள் அதிக அளவில் பணிக்கு வரவும், நாட்டின் பொருளாதார வளர்ச்சிக்கு பங்களிக்கவும் ஒரு சிறந்த கருவியாக அமையும் என்று அவர் குறிப்பிட்டார்.

பிரதமரின் இந்தக் கருத்து வெளியான உடனே, சமூக வலைதளங்களில் ‘மீம்’ மழை பொழியத் தொடங்கியது. பல கார்ப்பரேட் ஊழியர்கள் தங்களை அலுவலகத்திற்கு வரச் சொல்லி வற்புறுத்தும் மேலாளர்களை டேக் செய்து, “பிரதமரே சொல்லிவிட்டார், இப்போதாவது கேட்கிறீர்களா?” என்ற ரீதியில் கிண்டலாகப் பதிவிட்டனர். குறிப்பாக என் மேலாளரிடம் பேசுங்கள் என்ற வாசகம் ட்விட்டர் போன்ற தளங்களில் டிரெண்டானது.

மறுபுறம், இந்த விவாதம் பணி-வாழ்க்கை சமநிலை குறித்த தீவிரமான கருத்துக்களையும் எழுப்பியுள்ளது. ஊழியர்கள் பலரும் வீட்டிலிருந்தே வேலை செய்வதன் நன்மைகளை ஆதரித்தாலும், நிறுவனங்கள் மீண்டும் பழையபடி அலுவலகத்திற்கு வரச் சொல்லி கட்டாயப்படுத்துவதைச் சுட்டிக்காட்டினர். பிரதமரின் இந்த தொலைநோக்குப் பார்வை, நிறுவனங்களின் கொள்கைகளில் மாற்றத்தை ஏற்படுத்துமா என்பதைப் பொறுத்திருந்துதான் பார்க்க வேண்டும்.