“இனிதே ஆட்டம் ஆரம்பம்”…. பெங்களூருவில் நடிகர் பிரகாஷ்ராஜின் வாக்குரிமை பறிப்பு…. அவரே வெளியிட்ட பரபரப்பு வீடியோ….!

கர்நாடகாவில் தற்போது நடைபெற்று வரும் வாக்காளர் சிறப்புத் தீவிர திருத்தம் நடவடிக்கையின் போது, பெங்களூரு தொகுதியின் வாக்காளர் பட்டியலில் இருந்து தனது பெயர் நீக்கப்பட்டுள்ளதாக பிரபல நடிகர் பிரகாஷ் ராஜ் அதிர்ச்சி குற்றச்சாட்ட முன்வைத்துள்ளார். இது குறித்து அவர் இன்ஸ்டாகிராமில் வெளியிட்டுள்ள வீடியோவில், “அன்பான நண்பர்களே, உங்களுடன் ஒரு நகைச்சுவையைப் பகிர்ந்து கொள்ள விரும்புகிறேன். SIR நடவடிக்கைக்குப் பிறகு பெங்களூரு தொகுதியில் வாக்களிக்கும் உரிமை நீக்கப்பட்ட 65 லட்சம் வாக்காளர்களில் நானும் ஒருவன். இது நல்ல நகைச்சுவை இல்லையா? நான் இந்தத் தொகுதியில்தான் பிறந்தேன், வளர்ந்தேன், எனது பள்ளி, கல்லூரி படிப்புகள் மற்றும் நாடகப் பயிற்சிகளை இங்குதான் மேற்கொண்டேன்” எனத் தெரிவித்துள்ளார். மேலும், அதிகாரத்தில் இருப்பவர்களை விமர்சிக்கும் வகையில், தங்களுக்கு வாக்களிக்காத மக்களின் வாக்குரிமையை நீங்கள் பறிக்கலாம், ஆனால் உங்களை வீழ்த்துவதற்கான மக்களின் சக்தியை யாராலும் தடுக்க முடியாது என்றும், “இனிதே ஆட்டம் ஆரம்பம்” என்றும் அவர் ஆவேசமாக சவால் விடுத்துள்ளார்.

https://www.instagram.com/reel/Db4rx-CSKNB/?utm_source=ig_embed&ig_rid=AroCv733cbnyziek5l9_9GN

2019ஆம் ஆண்டு நடைபெற்ற நாடாளுமன்ற மக்களவைத் தேர்தலில், பிரகாஷ் ராஜ் பெங்களூரு மத்திய தொகுதியில் சுயேச்சை வேட்பாளராகப் போட்டியிட்டார் என்பது குறிப்பிடத்தக்கது. தான் போட்டியிட்ட தொகுதியிலேயே தனது பெயர் வாக்காளர் பட்டியலில் இருந்து நீக்கப்பட்டுள்ளது பெரும் பரபரப்பை ஏற்படுத்தியுள்ளது. இந்த நீக்கம் குறித்து கேள்வி எழுப்பியுள்ள அவர், தனது வாக்காளர் அடையாள அட்டையை மீண்டும் பெற என்னென்ன ஆவணங்களைக் காண்பிக்க வேண்டும் என்ற நடைமுறைகளைச் செய்யத் தயாராக இருப்பதாகவும் குறிப்பிட்டுள்ளார். வாக்காளர் பட்டியல் திருத்தப் பணிகளின் போது பல முக்கிய பிரமுகர்கள் மற்றும் சமூக ஆர்வலர்களின் பெயர்கள் நீக்கப்படுவதாக எழும் புகார்களுக்கு மத்தியில், பிரகாஷ் ராஜின் இந்த பதிவு சமூக வலைதளங்களில் பெரும் விவாதப் பொருளாக மாறியுள்ளது.