“ஈரான் அதிபருக்கு மோடி போட்ட ‘திடீர்’ போன் கால்”… உலக நாடுகளை அதிரவைத்த அந்த ஒரு வார்த்தை… மோடி கையில் உலகத்தின் சாவி….!

மத்திய கிழக்கு ஆசியாவில் நிலவும் போர்ச் சூழல் உலக நாடுகளிடையே பெரும் கவலையை ஏற்படுத்தியுள்ள நிலையில், இந்தியாவின் எரிசக்தி பாதுகாப்பை உறுதி செய்ய பிரதமர் நரேந்திர மோடி நேரடியாகக் களமிறங்கியுள்ளார். ஈரான் அதிபர் மசூத் பெசெஷ்கியனுடன் தொலைபேசியில் உரையாடிய பிரதமர், வளைகுடா பகுதியில் அமைதி நிலவ வேண்டியதன் அவசியத்தை வலியுறுத்தினார். குறிப்பாக, உலகின் 20 சதவீத எண்ணெய் போக்குவரத்து நடைபெறும் ‘ஹார்முஸ் ஜலசந்தி’ (Strait of Hormuz) பாதையின் பாதுகாப்பை அவர் சுட்டிக்காட்டினார். இந்தியாவின் கச்சா எண்ணெய் தேவையில் 40 சதவீதமும், எல்.என்.ஜி தேவையில் பாதியும் இந்த முக்கிய கடல்வழிப் பாதை வழியாகவே வருவதால், இப்பகுதியில் ஏற்படும் பதற்றம் இந்தியப் பொருளாதாரத்தில் நேரடித் தாக்கத்தை ஏற்படுத்தும் அபாயம் உள்ளது.

சமீபத்திய இஸ்ரேல் – ஈரான் மோதலில் எரிசக்தி மையங்கள் இலக்கு வைக்கப்பட்டதைத் தொடர்ந்து, சர்வதேச விநியோகச் சங்கிலி பாதிக்கப்படலாம் என பிரதமர் எச்சரித்துள்ளார். “யுத்தப் பாதை யாருக்கும் பலன் தராது; அமைதிப் பேச்சுவார்த்தை மட்டுமே தீர்வு” எனத் தனது நிலைப்பாட்டைத் தெளிவுபடுத்திய பிரதமர், ரம்ஜான் மற்றும் நவ்ரூஸ் வாழ்த்துகளைப் பகிர்ந்துகொண்டதோடு, கடல் வழிப் பாதைகளின் பாதுகாப்பையும் அங்குள்ள இந்தியர்களின் நலனையும் உறுதி செய்யுமாறு ஈரானைக் கேட்டுக்கொண்டார். இதற்குப் பதிலளித்த ஈரான் அதிபர், பிரிக்ஸ் (BRICS) அமைப்பின் முக்கிய நாடான இந்தியா, இப்பகுதியில் பதற்றத்தைத் தணிக்க ஆக்கப்பூர்வமான முடிவுகளை எடுக்க வேண்டும் என வேண்டுகோள் விடுத்துள்ளார்.

போர்ச் சூழலால் இந்தியாவில் பெட்ரோல், டீசல் தட்டுப்பாடு ஏற்படுமோ என்ற பொதுமக்களின் அச்சத்தைப் போக்க மத்திய பெட்ரோலிய அமைச்சகம் அதிரடி நடவடிக்கைகளை மேற்கொண்டுள்ளது. நாட்டில் போதுமான அளவு எரிபொருள் இருப்பு உள்ளதாகவும், பொதுமக்கள் பதற்றமடையத் தேவையில்லை என்றும் அரசு அறிவித்துள்ளது. உள்நாட்டுச் சுத்திகரிப்பு நிலையங்களில் எல்.பி.ஜி (LPG) உற்பத்தி வேகமெடுத்துள்ள நிலையில், வணிகப் பயன்பாட்டு சிலிண்டர்களின் விநியோகம் 20 சதவீதத்திலிருந்து 50 சதவீதமாக உயர்த்தப்பட்டுள்ளது. குறிப்பாக ஹோட்டல்கள், உணவகங்கள் மற்றும் பால் பண்ணைகளுக்கு முன்னுரிமை அடிப்படையில் எரிவாயு வழங்கத் திட்டமிடப்பட்டுள்ளது.

புலம்பெயர் தொழிலாளர்களின் நலனைக் கருத்தில் கொண்டு 5 கிலோ எடை கொண்ட சிறிய எல்.பி.ஜி சிலிண்டர்கள் தடையின்றி கிடைக்க வழிவகை செய்யப்பட்டுள்ளது. வளைகுடா நாடுகளில் போர் மேகங்கள் சூழ்ந்திருந்தாலும், இந்தியாவின் எரிசக்தித் தேவையைத் தடையின்றி பூர்த்தி செய்யத் தேவையான ‘மாஸ்டர் பிளானை’ மத்திய அரசு அமல்படுத்தியுள்ளது. சர்வதேச அளவில் அமைதிப் பேச்சுவார்த்தைகள் ஒருபுறம் நடந்தாலும், கச்சா எண்ணெய் விலை உயர்வு மற்றும் விநியோகச் சங்கிலி சவால்களைச் சமாளிக்க டெல்லி மிகத் தீவிரமாகச் செயல்பட்டு வருகிறது.