பெரும் பரபரப்பு..! வெள்ளை மாளிகை விருந்தில் தாக்குதல் நடத்திய ‘சைக்கோ’ நபரின் போட்டோவை பகிர்ந்த அதிபர் ட்ரம்ப்..!!

வாஷிங்டனில் அதிபர் ட்ரம்ப் மற்றும் முக்கிய அதிகாரிகள் பங்கேற்ற செய்தியாளர்கள் சங்க விருந்து நிகழ்ச்சியில், மர்ம நபர் ஒருவர் துப்பாக்கிச் சூடு நடத்தியதால் பெரும் பரபரப்பு ஏற்பட்டது. இந்தத் தாக்குதலைத் தொடர்ந்து, ரகசியப் பிரிவு அதிகாரிகள் அதிபரை உடனடியாகப் பாதுகாப்பு வளையத்திற்குள் கொண்டு வந்து பத்திரமாக வெளியேற்றினர். இந்தச் சம்பவத்தின்போது எடுக்கப்பட்ட கண்காணிப்பு கேமரா காட்சிகளை ட்ரம்ப் தனது சமூக வலைதள பக்கத்தில் பகிர்ந்துள்ளார். அதில், தாக்குதல் நடத்திய நபர் பாதுகாப்பு அரண்களைத் தாண்டி ஓடி வருவதும், அதிகாரிகள் அவரை நோக்கி விரைவதும் பதிவாகியுள்ளது.

மேலும், பிடிபட்ட அந்த மர்ம நபரை அதிகாரிகள் தரையில் அழுத்திப் பிடித்துக் கொண்டு இருக்கும் புகைப்படத்தையும் ட்ரம்ப் வெளியிட்டுள்ளார். அந்தப் படத்தில், சட்டை அணியாத நிலையில் உள்ள அந்த நபர், கைகள் பின்னால் கட்டப்பட்டுக் கீழே கிடத்தப்பட்டிருப்பது போன்ற காட்சிகள் உள்ளன. கலிபோர்னியாவைச் சேர்ந்த கோல் டோமஸ் ஆலன் (31) என அடையாளம் காணப்பட்ட அந்த நபர், துப்பாக்கிகள் மற்றும் கத்திகளுடன் தாக்குதலில் ஈடுபட்டதாகத் தெரிவிக்கப்பட்டுள்ளது. இந்தச் சம்பவத்தில் ரகசியப் பிரிவு அதிகாரி ஒருவரின் கவச உடையில் குண்டு பாய்ந்த போதிலும், அதிர்ஷ்டவசமாக உயிரிழப்புகள் ஏதும் ஏற்படவில்லை.