“காலி டப்பா ஆன தேனி”… மொத்தமாகச் சரிந்த ஓபிஎஸ் கோட்டை… விஜய்யுடன் கைகோர்க்கும் 30 மா.செ-க்கள்….!

தமிழக அரசியல் களத்தில் பெரும் பரபரப்பை ஏற்படுத்தியுள்ள நிகழ்வாக, முன்னாள் முதல்வர் ஓ. பன்னீர்செல்வம் தலைமையிலான அணியிலிருந்து முக்கிய நிர்வாகிகள் மற்றும் தொண்டர்கள் மொத்தமாக விலகி, நடிகர் விஜய் தலைமையிலான ‘தமிழக வெற்றி கழகத்தில்’ இணைய முடிவு செய்துள்ளனர். குறிப்பாக, திண்டுக்கல் கிழக்கு மாவட்டச் செயலாளர் சுப்பிரமணியன் தலைமையில் சுமார் 500-க்கும் மேற்பட்ட நிர்வாகிகள் ஓபிஎஸ் அணியிலிருந்து விலகுவதாக அதிகாரப்பூர்வமாக அறிவித்துள்ளனர். இது ஓபிஎஸ் கூடாரத்தில் பலத்த அதிர்ச்சியை ஏற்படுத்தியுள்ளது.

இந்த விலகல் குறித்து செய்தியாளர்களிடம் பேசிய சுப்பிரமணியன், தற்போதைய அரசியல் சூழலில் அதிமுகவின் உட்கட்சிப் பூசல்கள் மற்றும் தலைவர்களின் சுயநலப் போக்கு தொண்டர்களிடையே மிகுந்த வேதனையை ஏற்படுத்தியுள்ளதாகக் குறிப்பிட்டார். மக்களின் நலனுக்காகவும், உரிமைகளுக்காகவும் துணிச்சலுடன் குரல் கொடுக்கும் தலைவராக விஜய் திகழ்வதால், அவரது தலைமையில் இணைந்து பணியாற்ற முடிவெடுத்துள்ளதாக அவர் தெரிவித்தார். அதிமுகவின் மூத்த தலைவர்கள் தங்களின் ‘ஈகோ’வை விட்டுக்கொடுக்காததே இந்த வீழ்ச்சிக்குக் காரணம் என்றும் அவர் விமர்சித்தார்.

திண்டுக்கல் மாவட்ட நிர்வாகிகள் மட்டுமல்லாது, தமிழகம் முழுவதும் ஓபிஎஸ் அணியைச் சேர்ந்த சுமார் 30-க்கும் மேற்பட்ட மாவட்டச் செயலாளர்கள் தமிழக வெற்றி கழகத்தில் இணையத் தயாராக உள்ளதாகத் தகவல்கள் வெளியாகியுள்ளன. இவர்கள் அனைவரும் எவ்வித நிபந்தனையுமின்றி விஜய்யின் தலைமையை ஏற்று, 2026 சட்டமன்றத் தேர்தலில் அவரை முதலமைச்சராக்க உழைக்கப்போவதாகத் தீர்மானித்துள்ளனர். அடுத்த சில நாட்களில் முறைப்படி தங்களை சென்னைக்கு அழைத்துச் சென்று தவெகவில் இணைத்துக் கொள்ளவும் அவர்கள் திட்டமிட்டுள்ளனர்.

ஏற்கனவே அதிமுக மற்றும் ஓபிஎஸ் அணிகளில் நிலவி வரும் பிளவுகள் அந்த இயக்கங்களை பலவீனப்படுத்தி வரும் நிலையில், இந்தத் திடீர் வெளியேற்றம் வரும் 2026 தேர்தலுக்கு முன்பாகப் புதிய அரசியல் சமன்பாடுகளை உருவாக்கியுள்ளது. தேனி மற்றும் திண்டுக்கல் போன்ற ஓபிஎஸ்-ஸின் கோட்டை என கருதப்படும் பகுதிகளிலேயே இத்தகைய சரிவு ஏற்பட்டுள்ளது, தமிழக வெற்றி கழகத்திற்குப் புதிய உத்வேகத்தைத் தந்துள்ளதோடு, பிரதான திராவிடக் கட்சிகளுக்கு ஒரு சவாலாகவும் உருவெடுத்துள்ளது.