திருப்பதி போக பிளான் பண்றீங்களா..? ஒரே ஒரு டிக்கெட்.. 3 நாட்கள் தரிசனம்..! பக்தர்களுக்கு அடித்த ஜாக்பாட்…!!

திருப்பதி ஏழுமலையான் கோயிலில் ஆண்டுதோறும் நடைபெறும் மிக முக்கியமான விசேஷங்களில் ஒன்றான பவித்ர உற்சவம், இந்த ஆண்டு ஆகஸ்ட் 23 முதல் 25-ஆம் தேதி வரை நடைபெற உள்ளது. இதற்கான தரிசன டிக்கெட்டுகள் வரும் மே 21-ஆம் தேதி காலை 10 மணிக்கு திருமலை திருப்பதி தேவஸ்தானத்தின் அதிகாரப்பூர்வ இணையதளத்தில் வெளியிடப்படுகின்றன. இந்த உற்சவத்தில் பங்கேற்க விரும்பும் பக்தர்கள் ஆன்லைன் மூலம் முன்பதிவு செய்து தங்களது தரிசனத்தை உறுதி செய்து கொள்ளலாம்.

இந்த பவித்ர உற்சவ டிக்கெட்டின் சிறப்பம்சமே, ஒருமுறை டிக்கெட் எடுத்தால் உற்சவம் நடைபெறும் 3 நாட்களும் தொடர்ந்து ஏழுமலையானை தரிசிக்கும் வாய்ப்பு கிடைப்பதுதான். பொதுவாக ஒரு டிக்கெட்டில் ஒருமுறை மட்டுமே தரிசனம் செய்ய முடியும் என்ற நிலையில், இந்தச் சிறப்பு டிக்கெட் மூலம் பக்தர்கள் மூன்று நாட்களும் நடைபெறும் ஸ்நபன திருமஞ்சனம் உள்ளிட்ட முக்கிய சடங்குகளில் பங்கேற்று இறைவனை தரிசிக்கலாம். குடும்பத்துடன் செல்லும் பக்தர்களுக்கு இது ஒரு வரப்பிரசாதமாகக் கருதப்படுகிறது.

உலகப்புகழ் பெற்ற இக்கோயிலுக்கு நாள்தோறும் லட்சக்கணக்கான பக்தர்கள் வருகை தருகின்றனர். வெளிநாடுகள் மற்றும் அண்டை மாநிலங்களில் இருந்து வரும் பக்தர்கள் பல மணிநேரம் காத்திருந்து சுவாமி தரிசனம் செய்யும் சூழல் நிலவுகிறது. இத்தகைய விசேஷ நாட்களில் கூட்ட நெரிசல் அதிகமாக இருக்கும் என்பதால், பக்தர்கள் மே 21-ஆம் தேதி டிக்கெட் வெளியான சில நிமிடங்களிலேயே முன்பதிவு செய்து கொள்வது சிறந்தது.