“இன்டர்நெட் இல்லா உலகம்?.. கடலுக்கு அடியில் நடக்கும் மர்ம யுத்தம்”…. ஈரான் எடுத்த அந்த ஒரு முடிவு… உலகம் ஸ்தம்பிக்கும் அபாயம்…!

மத்திய கிழக்கில் அதிகரித்து வரும் போர் பதற்றங்கள், உலகளாவிய இணையப் பாதுகாப்பிற்குப் பெரும் சவாலாக உருவெடுத்துள்ளன. குறிப்பாக, ஹார்முஸ் மற்றும் பாப் எல்-மண்டேப் ஜலசந்திகள் வழியாகச் செல்லும் சுமார் 20-க்கும் மேற்பட்ட கடலடி ஃபைபர் ஆப்டிக் கேபிள்கள் (Submarine Cables) சிதைக்கப்படலாம் என்ற அச்சம் உலக நாடுகளை உலுக்கி வருகிறது. ஆசியா, ஐரோப்பா மற்றும் ஆப்பிரிக்காவை இணைக்கும் டிஜிட்டல் நரம்பு மண்டலங்களாகத் திகழும் இந்த மெல்லிய கேபிள்கள், கண்டங்களுக்கு இடையிலான 90 சதவீதத்திற்கும் அதிகமான தரவுப் பரிமாற்றத்தைக் கையாளுகின்றன. தற்போது இப்பகுதிகளில் நிலவும் போர்ச் சூழல், ஒரு பெரும் “டிஜிட்டல் முடக்கத்திற்கு” வித்திடுமோ என்ற கவலை எழுந்துள்ளது.

ஈரான் பதித்துள்ள கடல் கண்ணிவெடிகள் மற்றும் ஹூதி கிளர்ச்சியாளர்களின் தொடர் தாக்குதல்கள் காரணமாக, இந்தப் பகுதியில் பாதுகாப்புச் சூழல் மிகவும் மோசமடைந்துள்ளது. பொதுவாக, கடலடி கேபிள்கள் சேதமடைந்தால் பிரத்யேகக் கப்பல்கள் மூலம் அவை உடனடியாகச் சரிசெய்யப்படும். ஆனால், தற்போது நிலவும் போர் அபாயத்தால் பழுதுபார்க்கும் கப்பல்கள் அந்தப் பகுதிக்குள் நுழைய முடியாத நிலை ஏற்பட்டுள்ளது. இந்த முட்டுக்கட்டை நீடித்தால், சிறிய அளவிலான தொழில்நுட்பக் கோளாறுகள் கூட சரிசெய்யப்படாமல், ஒட்டுமொத்த இணைய வழித்தடமும் செயலிழக்கும் அபாயம் உள்ளது.

இந்த நெருக்கடி இந்தியாவின் சர்வதேச இணைய இணைப்புகள் முதல் கூகுள், அமேசான் போன்ற உலகளாவிய ஜாம்பவான்களின் தரவு மையங்கள் வரை அனைத்தையும் நேரடியாகப் பாதிக்கும். வங்கிச் சேவைகள், பங்குச் சந்தை வர்த்தகம் மற்றும் அதிவேக ஏஐ (AI) தொழில்நுட்பங்கள் இந்த கேபிள்களையே நம்பியுள்ளன. ஒருவேளை இந்தத் தொடர்பு துண்டிக்கப்பட்டால், அது உலகப் பொருளாதாரத்தில் எண்ணெய் விநியோகத் தடையை விட மோசமான பாதிப்புகளை ஏற்படுத்தும். வல்லுநர்களின் எச்சரிக்கைப்படி, இந்த டிஜிட்டல் முடக்கம் உலக நாடுகளின் வர்த்தகத்தை நிலைகுலையச் செய்து, மீள முடியாத பொருளாதாரப் பின்னடைவுக்கு வழிவகுக்கக்கூடும்.