“உலகமே உறைந்து போன வினாடி”… ஈரானின் அணுசக்தி மையம் மீது அதிரடி வான்வழித் தாக்குதல்… ட்ரம்ப்பின் அடுத்த மூவ் இதுதானா?….!

ஈரான் – இஸ்ரேல் இடையிலான போர் நான்காவது வாரமாகத் தீவிரமடைந்துள்ள நிலையில், ஈரானின் முதன்மையான நடான்ஸ் (Natanz) அணுசக்தி செறிவூட்டும் நிலையத்தின் மீது அமெரிக்கா இன்று வான்வழித் தாக்குதலை நடத்தியுள்ளது. தெஹ்ரானிலிருந்து 220 கி.மீ தொலைவில் அமைந்துள்ள இந்த முக்கியத் தளம் இதற்கு முன்னரும் பலமுறை இலக்கு வைக்கப்பட்டுள்ளது. தற்போதைய தாக்குதலால் பெரும் பதற்றம் உருவான போதிலும், அங்கு கதிர்வீச்சு கசிவு ஏதும் ஏற்படவில்லை என்று ஈரானின் அதிகாரப்பூர்வ ‘மிசான்’ செய்தி நிறுவனம் உறுதிப்படுத்தியுள்ளது.

மறுபுறம், அமெரிக்க அதிபர் டொனால்ட் டிரம்ப் இப்பகுதியில் ராணுவ நடவடிக்கைகளைக் குறைப்பதாகக் கூறினாலும், கள யதார்த்தம் வேறாக உள்ளது. அமெரிக்கா கூடுதலாக மூன்று கடற்படைத் தாக்குதல் கப்பல்களுடன் சுமார் 2,500 கடற்படையினரை இப்பகுதிக்கு அனுப்பியுள்ளது. ஒருபுறம் அமைதி பேசுவதும், மறுபுறம் படைகளைக் குவித்துத் தாக்குதலைத் தொடர்வதும் அமெரிக்காவின் இரட்டை நிலைப்பாட்டையே காட்டுகிறது. இந்த முரண்பாடான நகர்வுகள் மத்திய கிழக்கில் ஒரு முழு அளவிலான போர் மூளும் அச்சத்தை உலக நாடுகளிடையே அதிகரித்துள்ளது.

இந்தத் தாக்குதலுக்குப் பதிலடியாக, இஸ்ரேலை நோக்கி ஈரான் ஏவுகணைகளையும் ட்ரோன்களையும் ஏவியது. இதில் சிலவற்றைச் சவுதி அரேபியா தடுத்து நிறுத்தியதாகத் தகவல்கள் தெரிவிக்கின்றன. ஈரானின் பதிலடி ஒருபுறம் இருக்க, உலகப் பொருளாதாரத்திலும் இந்தப் போர் அதிர்வுகளை ஏற்படுத்தியுள்ளது. குறிப்பாக, கச்சா எண்ணெய் விலை உயர்வு மற்றும் பங்குச் சந்தை நிலையற்ற தன்மை காரணமாக சர்வதேச அளவில் எரிசக்தி நெருக்கடி உருவாகும் சூழல் ஏற்பட்டுள்ளது.

இந்த நெருக்கடியைச் சமாளிக்க, கப்பல்களில் ஏற்கனவே ஏற்றப்பட்ட ஈரானியக் கச்சா எண்ணெயை உலக நாடுகளுக்கு விற்பனை செய்ய அமெரிக்கா அனுமதியளித்துள்ளது. அதாவது, ஈரான் மீதான பொருளாதாரத் தடைகளில் இதற்காக மட்டும் தற்காலிக விலக்கு அளிக்கப்பட்டுள்ளது. எரிசக்திச் சந்தையைச் சமன் செய்ய எண்ணெய்க்குப் பச்சைக்கொடி காட்டும் அமெரிக்கா, அதே நேரத்தில் ஈரானின் அணுசக்தித் தளங்களைச் சிதைப்பதிலும் முனைப்பு காட்டுவது சர்வதேச அரசியலில் பெரும் விவாதத்தை ஏற்படுத்தியுள்ளது.