போனால் போகட்டும் போடா…. “புஷ்பவனம் குப்புசாமிக்கு பதவி”…. கொந்தளித்த நாஞ்சில் சம்பத்… தவெக-வை உலுக்கும் உள்கட்சி மோதல்….!

தமிழக வெற்றிக் கழகத்தில் இணைந்த நாஞ்சில் சம்பத், கட்சியின் கொள்கைப்பரப்புச் செயலாளராகப் பணியாற்றி வருகிறார். கடந்த மூன்று நாட்களாக அவர் தவெக தலைவரும் முதலமைச்சருமான விஜய் மீதும், அவரைச் சுற்றியுள்ள அதிகார மையங்கள் மீதும் கடும் அதிருப்தியில் இருப்பதாகவும், விரைவில் தனது பதவியையும் கட்சியையும் துறக்கவுள்ளதாகவும் செய்திகள் வெளியாகி வருகின்றன. தனது சமூக வலைதளப் பக்கத்தில் அவர் பதிவிட்ட சில மறைமுகக் கருத்துகளின் அடிப்படையில் இந்த யூகங்கள் இறக்கை கட்டினாலும், அவர் இதுவரை கட்சியிலிருந்து முறைப்படி விலகவில்லை; அது தொடர்பான இறுதி முடிவையும் எடுக்கவில்லை என்பதே தற்போதைய கள நிலவரமாக உள்ளது.

இந்த அதிருப்திக்கு பின்னால் சில முக்கியக் அரசியல் காரணங்கள் இருப்பதாகக் கூறப்படுகிறது. கடந்த 2026 சட்டமன்றத் தேர்தலின் போது தென் மாவட்டங்களில் ஒரு தொகுதியில் போட்டியிட நாஞ்சில் சம்பத் விரும்பியதாகவும், ஆனால் அவருக்கு வாய்ப்பு மறுக்கப்பட்டதாகவும் தெரிகிறது. அப்போது விஜய்யை நேரில் சந்தித்தபோது, “தேர்தலில் போட்டியிட வாய்ப்பு கிடைக்கவில்லை என்று வருந்த வேண்டாம்; நாம் வெற்றி பெற்று ஆட்சிக்கு வந்ததும் உங்களுக்கு உரிய உயர்பதவிகள் வழங்கப்படும்” என விஜய் உறுதியளித்ததாகக் கூறப்படுகிறது. இந்த வாக்குறுதியை நாஞ்சில் சம்பத் பெரிதும் நம்பியிருந்தார்.

இந்நிலையில் தவெக ஆட்சியைப் பிடித்து விஜய் முதலமைச்சரானதைத் தொடர்ந்து, சமீபத்தில் பல்வேறு அரசு வாரியப் பதவிகள் நிரப்பப்பட்டு வந்தன. அப்போது தமிழ்நாடு இயல் இசை நாடக மன்றத்தின் தலைவர் பதவியை நாஞ்சில் சம்பத் எதிர்பார்த்துள்ளார். தனது விருப்பத்தை முதலமைச்சரின் முக்கிய ஆலோசகர்களிடமும், அமைச்சர் ஆதவ் அர்ஜுனாவிடமும் அவர் தெரிவித்திருந்த நிலையில், அந்தப் பதவிக்கு நாட்டுப்புறக் கலைஞர் புஷ்பவனம் குப்புசாமி தேர்வு செய்யப்பட்டுள்ளதாக நாஞ்சில் சம்பத்திற்குத் தெரியவந்துள்ளது. இதனையடுத்தே, விஜய்யையும் அவரது ஆலோசகர்களையும் தொடர்பு கொள்ள அவர் எடுத்த முயற்சிகள் தோல்வியில் முடிந்ததால், ஏமாற்றமும் அதிர்ச்சியும் அடைந்த சம்பத் தனது ‘எக்ஸ்’ தளத்தில் “போனால் போகட்டும் போடா” என அதிருப்தியை வெளிப்படுத்தியுள்ளார்.

பதவி கிடைக்காதது மட்டுமின்றி, சமீபகாலமாகக் கட்சி நிகழ்ச்சிகளுக்கோ அல்லது இடைத்தேர்தல் பிரச்சாரத்திற்கோ தமக்கு அழைப்பு விடுக்கப்படவில்லை என்ற வருத்தமும் அவருக்குள் புகையத் தொடங்கியுள்ளது. தற்போது பரவி வரும் செய்திகள் குறித்து நாஞ்சில் சம்பத்தின் ஆதரவாளர்களிடம் கேட்டபோது, “இடைத்தேர்தல் முடிந்த பிறகு கட்சியின் தலைமை அவரை அழைத்துச் பேசி சமாதானப்படுத்தினால் அவர் அமைதியாகத் தொடர்வார்; இல்லையெனில் தவெகவிலிருந்து விலகுவதைத் தவிர அவருக்கு வேறு வழியில்லை” எனக் கூறுகின்றனர். கட்சித் தலைமையின் அடுத்தகட்ட நகர்வைப் பொறுத்தே நாஞ்சில் சம்பத்தின் அரசியல் பயணம் தீர்மானிக்கப்படும் எனத் தெரிகிறது.