“சுறா படம் பார்த்துட்டு வந்ததும் நான் பிறந்தேன்”… விஜய் ரசிகரின் வியக்கவைக்கும் பெயர்…. ஆதார் கார்டைப் பார்த்து மிரண்டு போன செய்தியாளர்…..!

வேலூர் மாவட்டம் அகரம்சேரியில் நடைபெற்ற தமிழக வெற்றிக் கழகத்தின் நிர்வாகிகள் ஆலோசனைக் கூட்டத்தில், நடிகர் விஜய்யின் தீவிர ரசிகர் ஒருவர் தனது பெயரைக் கூறி அங்கிருந்தவர்களை ஆச்சரியத்தில் ஆழ்த்தியுள்ளார். விஜய்யைக் காண்பதற்காகத் திரண்டிருந்த ஆயிரக்கணக்கான ரசிகர்களில் ஒருவரான அந்தச் சிறுவன், தனக்கு ‘சுறா’ என்று பெயரிடப்பட்டதற்கான சுவாரஸ்யமான பின்னணியைச் செய்தியாளர்களிடம் பகிர்ந்து கொண்டார்.

கடந்த 2010-ஆம் ஆண்டு விஜய் நடிப்பில் வெளியான ‘சுறா’ திரைப்படம் வெளியான சமயத்தில், அந்தச் சிறுவனின் தாய் அப்படத்தைப் பார்ப்பதற்காகத் திரையரங்கிற்குச் சென்றுள்ளார். படம் பார்த்துவிட்டு வீடு திரும்பிய உடனேயே அவருக்குப் பிரசவ வலி ஏற்பட்டு அந்தச் சிறுவன் பிறந்துள்ளான். விஜய்யின் மீது கொண்ட அளவற்ற அன்பின் காரணமாக, அந்தத் தாய் தனது மகனுக்கு அந்தத் திரைப்படத்தின் பெயரையே சூட்டியுள்ளார்.

செய்தியாளர் இதனை நம்ப மறுத்தபோது, அந்தச் சிறுவன் சற்றும் தயங்காமல் தனது ஆதார் அட்டையை எடுத்துக் காட்டினார். அதில் அவரது பெயர் ‘சுறா சிவலிங்கம்’ என்று அச்சிடப்பட்டிருந்தது. இந்தப் பெயரால் நண்பர்கள் யாராவது கிண்டல் செய்கிறார்களா என்று கேட்டதற்கு, “யார் கிண்டல் செய்தாலும் அதைப் பற்றி நான் கவலைப்படமாட்டேன், அதைத் தட்டிவிட்டுப் போய்க்கொண்டே இருப்பேன்” என்று மிகுந்த தன்னம்பிக்கையுடன் பதிலளித்தார்.

தமிழக வெற்றிக் கழகக் கூட்டங்களில் இது போன்ற உணர்ச்சிப்பூர்வமான மற்றும் விசித்திரமான ரசிகர்களின் செயல்கள் தொடர்ந்து அரங்கேறி வருகின்றன. ஏற்கனவே ஒரு பெண்மணி தனது கணவரை விட விஜய்யே முக்கியம் என்று கூறியதும், மற்றொருவர் விஜய் அரசியலுக்கு வராவிட்டால் சோற்றில் விஷம் வைத்துவிடுவேன் என்று மிரட்டியதும் சமூக வலைதளங்களில் விவாதங்களை ஏற்படுத்தின. அந்த வரிசையில், தற்போது இந்த ‘சுறா’ ரசிகரின் காணொளியும் இணையத்தில் வைரலாகி வருகிறது.