“பிரதமருக்கு முதல்வர் விஜய் போட்ட அவசரக் கடிதம்!.. “மோடி சார்.. கர்நாடகாவுக்கு கொஞ்சம் அட்வைஸ் பண்ணுங்க.. கோட்டையில் வெடித்த பரபரப்பு..!!

காவிரி ஆற்றின் குறுக்கே மேகதாது அணை கட்டுவதற்கான பூமி பூஜை அறிவிப்பைக் கர்நாடக அரசு வெளியிட்டுள்ள நிலையில், இந்த விவகாரத்தில் உச்சநீதிமன்றத்தின் தீர்ப்பை எந்தவிதத்திலும் மீறக்கூடாது என அவர்களுக்கு அறிவுறுத்துமாறு பாரதப் பிரதமர் நரேந்திர மோடிக்குத் தமிழக முதலமைச்சர் விஜய் அவசரக் கடிதம் ஒன்றை எழுதியுள்ளார். காவிரி நடுவர் மன்றத்தின் இறுதி ஆணையையும், உச்சநீதிமன்றத்தின் தீர்ப்பையும் அப்பட்டமாக மீறும் வகையில் கர்நாடக அரசு மேகதாது நீர்த்தேக்கத்திற்கான ‘பூமி பூஜை’ அறிவிப்பை வெளியிட்டுள்ளதாகக் கடிதத்தில் சுட்டிக்காட்டியுள்ளார். கர்நாடக மாநிலத் துணை முதலமைச்சரின் இத்தகைய பொதுவெளி அறிவிப்பு, வாழ்வாதாரத்திற்காகக் காவிரியை மட்டுமே நம்பியிருக்கும் தமிழகத்தின் லட்சக்கணக்கான விவசாயிகளிடையே மிகுந்த கவலையையும் அச்சத்தையும் ஏற்படுத்தியுள்ளதாக அவர் தெரிவித்துள்ளார்.

காவிரி நதிநீர் விவகாரம் என்பது முப்பது ஆண்டுகளுக்கும் மேலான நீண்ட சட்டப் போராட்டத்திற்குப் பிறகே ஒரு முடிவுக்கு வந்தது என்பதைப் பிரதமருக்கு நினைவூட்டியுள்ள முதலமைச்சர் விஜய், தற்போது 16.02.2018 தேதியிட்ட உச்சநீதிமன்றத் தீர்ப்பே அமலில் உள்ளதைச் சுட்டிக்காட்டியுள்ளார். காவிரி நடுவர் மன்றம் அனுமதித்த திட்டங்களின் பட்டியலில் இந்த மேகதாது திட்டம் இடம்பெறவில்லை என்பதை உச்சநீதிமன்றமும் உறுதிப்படுத்தியுள்ளது. மேலும், காவிரிப் படுகை ஏற்கனவே நீர்ப்பற்றாக்குறை உள்ள படுகை என்பதால், சம்பந்தப்பட்ட மாநிலங்களுக்கு நீர் ஏற்கனவே ஒதுக்கப்பட்டுவிட்டது. எனவே, புதிய பெரிய நீர்த்தேக்கத்தை உருவாக்குவதற்கோ அல்லது கூடுதல் நீரைப் பயன்படுத்துவதற்கோ எவ்வித வாய்ப்பும் இல்லை என்றும், வேறு ஏதேனும் புதிய திட்டத்தைத் திட்டமிடுவது உச்சநீதிமன்றத் தீர்ப்பில் தலையிடுவதற்குச் சமமானதாகும் என்றும் கடிதத்தில் அழுத்தமாகப் பதிவு செய்துள்ளார்.

தமிழகத்திற்கு உறுதி செய்யப்பட வேண்டிய நீர்வரத்துக்கான கூறுகளில் ஒன்றான ‘கட்டுப்பாடற்ற நீர்ப்பிடிப்புப் பகுதியிலிருந்து’ உருவாகும் நீர்வரத்தைத் தடுப்பதற்கே கர்நாடக மாநிலம் முயன்று வருவதாகத் தமிழ்நாடு உறுதியாகக் கருதுகிறது. தமிழக எல்லையின் மிக அருகிலேயே 67.16 டி.எம்.சி. கொள்ளளவு கொண்ட புதிய மேகதாது திட்டத்தை முன்மொழிவது, கீழ்ப்பகுதியில் உள்ள மாநிலத்திற்குத் திட்டமிடப்பட்ட நீர் விநியோகத்தைப் பாதிக்கும் வகையிலான எவ்வித நடவடிக்கையையும் மேல்பகுதி மாநிலம் மேற்கொள்ளக்கூடாது என்ற உச்சநீதிமன்றத் தீர்ப்பின் தெளிவான மீறலாகும் என்றும் முதலமைச்சர் விஜய் தனது கடிதத்தில் விளக்கியுள்ளார்.

இறுதியாக, இத்திட்டம் தொடர்பான சுற்றுச்சூழல் விதிகளையும் கர்நாடகா மீறியுள்ளதை முதலமைச்சர் சுட்டிக்காட்டியுள்ளார். கர்நாடக அரசு சுற்றுச்சூழல் தாக்க மதிப்பீட்டு (EIA) ஆய்விற்கான ஆய்வு வரையறைகளைப் பெற முயன்றபோது, மாநிலங்களுக்கு இடையேயான சிக்கல்கள் இருப்பதால் இணக்கமான தீர்வு எட்டப்பட வேண்டும் எனக் கூறி 19.07.2019 அன்றே மத்திய அமைச்சகத்தின் வல்லுநர் குழு அக்கோரிக்கையைத் திருப்பியனுப்பியது. மத்திய சுற்றுச்சூழல் அமைச்சகம் இதுவரை இதற்கான அனுமதியை வழங்கவே இல்லை என்பதால், மேகதாது திட்டப் பணிகளை முன்னெடுத்துச் செல்ல கர்நாடக அரசு மேற்கொள்ளும் முயற்சி உச்சநீதிமன்றத் தீர்ப்பை மட்டுமல்லாமல், நாட்டின் சுற்றுச்சூழல் சட்டங்களையும் அப்பட்டமாக மீறும் செயலாகும் என்று முதலமைச்சர் விஜய் அக்கடிதத்தில் தெரிவித்துள்ளார்.