“26 நாட்கள் போராட்டம்.. 10 தனிப்படைகள், சிபிசிஐடி விசாரணை… இன்னும் விடை கிடைக்காத மர்மம்”…. மேல்மலையனூர் கோவிலில் கதறி அழுத தாய்…. செஞ்சி சிறுமி வழக்கில் உருக்கமான திருப்பம்…!

விழுப்புரம் மாவட்டம் செஞ்சி அருகே உள்ள ஆலம்பூண்டி கிராமத்தைச் சேர்ந்த வடிவேலு – பவானி தம்பதியின் 7 வயது மகள் ஹேமலதா (ஹேமாவதி). கடந்த மாதம் 11-ஆம் தேதி மாலை தனது பிறந்தநாளைக் குடும்பத்தினருடன் மகிழ்ச்சியாகக் கொண்டாடிய சிறுமி, அன்று இரவு பெற்றோருடன் உறங்கச் சென்றுள்ளாள். மறுநாள் அதிகாலை வேளையில் சிறுமியை திடீரென காணாமல் போனதைக் கண்டு அதிர்ச்சியடைந்த பெற்றோர், உடனடியாகக் காவல் நிலையத்தில் புகாரளித்தனர். பிறந்தநாள் கொண்டாடிய சில மணி நேரங்களிலேயே சிறுமி மாயமான இச்சம்பவம் அப்பகுதியில் பெரும் சோகத்தையும் அதிர்ச்சியையும் ஏற்படுத்தியது.

சிறுமி மாயமாகி இன்றோடு 26 நாட்கள் கடந்த நிலையிலும், அவரைப் பற்றிய எந்தவொரு உறுதியான தகவலும் கிடைக்காததால், தாய் பவானி தனது கடைசி நம்பிக்கையாக ஆன்மிகத்தைச் சரணடைந்துள்ளார். பிரசித்தி பெற்ற மேல்மலையனூர் ஸ்ரீ அங்காளம்மன் திருக்கோவிலுக்கு வந்த அவர், ஆலய வளாகத்தில் மடிப்பிச்சை ஏந்தி, “அம்மா… என் மகளை என்னிடம் திருப்பிக் கொடு! அவள் எங்கிருந்தாலும் நல்லபடியாக என்னிடம் வந்து சேர வேண்டும்” என கண்ணீர் மல்கக் கதறி வேண்டுதல் வைத்தார். இந்த உருக்கமான காட்சியைக் கண்ட சக பக்தர்களும் உறவினர்களும் கண்ணீர் சிந்தியதுடன், அம்மன் அருள் புரிந்து குழந்தையைச் மீட்டுக் தருவாள் எனத் தாய்க்கு ஆறுதல் கூறினர்.

ஆரம்பத்தில் இச்சம்பவம் தொடர்பாக உள்ளூர் காவல் துறையினர் 10 தனிப்படைகள் அமைத்து தீவிர விசாரணை நடத்தினர். பல இடங்களில் தேடுதல் வேட்டை நடத்தியும், சந்தேகத்திற்குரிய நபர்களிடம் விசாரணை மேற்கொண்டும் சிறுமி குறித்து எந்தவிதமான முக்கியமான துப்பும் கிடைக்கவில்லை. போதிய முன்னேற்றம் இல்லாத காரணத்தினால், பொதுமக்களின் கோரிக்கையை ஏற்று வழக்கு விசாரணை உடனடியாகச் சிறப்புப் பிரிவான சிபிசிஐடி (CBCID) போலீஸார் வசம் ஒப்படைக்கப்பட்டது.

தற்போது சிபிசிஐடி காவல் துணைக்கண்காணிப்பாளர்கள் வேல்முருகன் மற்றும் கீதா ஆகியோர் தலைமையில் 5 புதிய தனிப்படைகள் அமைக்கப்பட்டு விசாரணை தீவிரப்படுத்தப்பட்டுள்ளது. கடந்த பல நாட்களாகச் சிபிசிஐடி போலீஸார் ஆலம்பூண்டி மற்றும் அதன் சுற்றியுள்ள பகுதிகளில் முகாமிட்டு விசாரணை நடத்தி வருகின்றனர். ஏற்கனவே உள்ளூர் போலீஸார் சேகரித்த ஆதாரங்கள், கண்காணிப்பு கேமரா பதிவுகள், செல்போன் டவர் சிக்னல்கள் (CDR) ஆகியவற்றைக் கொண்டு விரிவான புலனாய்வு மேற்கொள்ளப்பட்டு வருகிறது. மேலும், சிறுமியின் பெற்றோர், உறவினர்கள் மற்றும் கிராம மக்கள் என அனைவரிடமும் மீண்டும் கூடுதல் தகவல்களைப் பதிவு செய்து விசாரணையை முடுக்கிவிட்டுள்ளனர்.

ஒருபுறம் சிபிசிஐடி போலீஸார் நவீன தொழில் நுட்பங்கள் மற்றும் தீவிர விசாரணையின் மூலம் சிறுமியைத் தேடி வரும் வேளையில், மற்றொருபுறம் ஊர் பொதுமக்களும் தன்னார்வலர்களும் தங்களால் இயன்ற முயற்சிகளைச் செய்து வருகின்றனர். இருப்பினும், 26 நாட்கள் கடந்தும் தன் கண்மணி எங்கிருக்கிறாள் என்று தெரியாமல் தவிக்கும் அந்தத் தாயின் கண்ணீர் வேண்டுதல், மேல்மலையனூர் கோவிலுக்கு வந்திருந்த அத்தனை பேரின் மனதையும் உருக வைப்பதாக அமைந்தது. சிறுமி ஹேமலதா விரைவில் பாதுகாப்பாக மீட்கப்பட வேண்டும் என்பதே அனைவரின் ஒரே பிரார்த்தனையாக உள்ளது.