“லேட்டா வந்தாலும் லேட்டஸ்டா வருவேன்”… வழியில் எங்கும் நிக்காதீங்க… தொண்டர்களுக்கு ஸ்டாலின் போட்ட திடீர் தடை.. பறந்தது உத்தரவு….!

தமிழக சட்டசபைத் தேர்தல் வரும் ஏப்ரல் 23 ஆம் தேதி நடைபெற உள்ள நிலையில், திமுக தலைமையிலான கூட்டணி தொகுதிப் பங்கீட்டை வெற்றிகரமாக நிறைவு செய்துள்ளது. “லேட்டா வந்தாலும் லேட்டஸ்டாக வரும்” என்று கூறி, 164 வேட்பாளர்கள் அடங்கிய பட்டியலை வெளியிட்ட திமுக தலைவர் மு.க. ஸ்டாலின், தற்போது தனது அனல் பறக்கும் தேர்தல் பிரச்சாரத்தைத் தொடங்கத் தயாராகிவிட்டார். திமுக தலைமைக் கழகம் வெளியிட்டுள்ள அறிவிப்பின்படி, மதச்சார்பற்ற முற்போக்குக் கூட்டணி வேட்பாளர்களை ஆதரித்து தமிழகம் முழுவதும் அவர் வாக்கு சேகரிக்க உள்ளார்.

இந்த தேர்தல் போர்முரசு, மறைந்த முன்னாள் முதல்வர் கருணாநிதியின் பிறந்த மண்ணான திருவாரூரில் இருந்து தொடங்குகிறது. வரும் மார்ச் 31 ஆம் தேதி மாலை 5 மணிக்கு திருவாரூர் தெற்கு ரத வீதியில் நடைபெறும் பிரம்மாண்ட பொதுக்கூட்டத்தில் ஸ்டாலின் தனது முதல் கட்டப் பிரச்சாரத்தை மேற்கொள்கிறார். இதில் திருவாரூர், திருத்துறைப்பூண்டி, நன்னிலம், மன்னார்குடி ஆகிய தொகுதிகளின் வேட்பாளர்கள் பங்கேற்கின்றனர். சென்டிமென்ட் ரீதியாகவும், அரசியல் ரீதியாகவும் முக்கியத்துவம் வாய்ந்த திருவாரூரில் இருந்து தனது வெற்றிக் பயணத்தை அவர் ஆரம்பிக்கிறார்.

திருவாரூரைத் தொடர்ந்து, ஏப்ரல் 1 ஆம் தேதி காலை 9 மணிக்கு திருச்சி உழவர் சந்தையிலும், அன்று மாலை 5 மணிக்கு கரூரிலும் நடைபெறும் பொதுக்கூட்டங்களில் ஸ்டாலின் உரையாற்றுகிறார். இதனைத் தொடர்ந்து ஏப்ரல் 2 ஆம் தேதி ஈரோடு மற்றும் கோவை மாவட்டங்களில் தனது தீவிரப் பிரச்சாரத்தை அவர் முன்னெடுக்க உள்ளார். அடுத்தடுத்த கட்டப் பிரச்சாரப் பயணங்கள் குறித்த அறிவிப்புகள் விரைவில் வெளியாகும் என எதிர்பார்க்கப்படுகிறது. வேட்பாளர் பட்டியல் வெளியான கையோடு, களப்பணியில் திமுக வேகம் காட்டி வருவது தொண்டர்களிடையே உற்சாகத்தை ஏற்படுத்தியுள்ளது.

குறித்த நேரத்திற்குள் பொதுக்கூட்ட இடங்களுக்குச் செல்ல வேண்டியுள்ளதால், காலத்தின் அருமை கருதி வழிநெடுகிலும் வேறு எந்த நிகழ்ச்சிகளையும் ஏற்பாடு செய்ய வேண்டாம் என திமுக தலைமை கழகம் கட்சியினருக்குக் கண்டிப்பான உத்தரவைப் பிறப்பித்துள்ளது. முதல்வர் ஸ்டாலினின் இந்தப் பயணத் திட்டம் டெல்டா மற்றும் கொங்கு மண்டலங்களில் தற்போதே அரசியல் வெப்பத்தை அதிகரிக்கச் செய்துள்ளது.