நீங்க ஓட்டுக்கு காசு கொடுக்கலாம், நாங்க டிக்கெட் வித்தா ஊழலா?…. விஜய்க்கு ஆதரவாக குதித்த மன்சூர் அலிகான்….!

தமிழக வெற்றிக் கழகத்தின் தலைவர் விஜய், சமீபத்தில் நடைபெற்ற அக்கட்சியின் நிர்வாகிகள் கூட்டத்தில் திமுக மற்றும் அதிமுக ஆகிய இரு கட்சிகளையும் கடுமையாக விமர்சித்துப் பேசினார். இதற்குப் பதிலடி கொடுக்கும் விதமாக, அதிமுக மற்றும் பிற அரசியல் கட்சியினர் விஜய்யின் சினிமா பட டிக்கெட் விலையைச் சுட்டிக்காட்டி விமர்சனம் செய்தனர். குறிப்பாக, “விஜய் தனது படங்களுக்கு ஆயிரக்கணக்கில் டிக்கெட் கட்டணம் வசூலிப்பதைக் கண்டுகொள்ளாமல், ஊழலைப் பற்றிப் பேசுவது வேடிக்கையாக உள்ளது” என்று திமுக மற்றும் அதிமுக தரப்பில் குற்றச்சாட்டுகள் முன்வைக்கப்பட்டன.

இந்த நிலையில், சினிமா விழா ஒன்றில் கலந்துகொண்ட நடிகர் மன்சூர் அலிகானிடம், விஜய்யின் பட டிக்கெட்டுகள் 2000 ரூபாய்க்கு விற்கப்படுவது குறித்து செய்தியாளர்கள் கேள்வி எழுப்பினர். அதற்கு தனது பாணியில் பதிலளித்த மன்சூர் அலிகான், “அவர்களுக்கு அந்த அதிகாரம் உள்ளது, விற்கிறார்கள்; மக்கள் விருப்பப்பட்டு வாங்குகிறார்கள், இதில் உங்களுக்கு என்ன பிரச்சனை?” என்று கேள்வி எழுப்பினார். மேலும், சினிமா டிக்கெட் விலையை ஊழலோடு ஒப்பிடுவது தவறு என்றும் அவர் வாதிட்டார்.

தொடர்ந்து பேசிய அவர், தேர்தலின் போது ஓட்டுக்கு 2000 முதல் 5000 ரூபாய் வரை அரசியல் கட்சிகள் பணம் கொடுப்பதைக் கடுமையாகச் சாடினார். “தேர்தலில் ஓட்டுக்காகக் கொடுக்கப்படும் அந்தப் பணம் மக்களின் வரிப்பணம் தானே தவிர, அரசியல்வாதிகள் தங்கள் சொந்தப் பணத்தைக் கொடுப்பதில்லை; அதுதான் உண்மையான ஊழல்” என்று ஆவேசமாகக் கூறினார். மன்சூர் அலிகானின் இந்தத் துணிச்சலான கருத்துகள் தற்போது சமூக வலைத்தளங்களில் வைரலாகி வருகின்றன.