‘சின்னம்மா’வின் புதிய அவதாரம்… 2026-ல் போட்டியேயின்றி வெற்றி… மதுரை போஸ்டர்களால் ஆடிப்போன அரசியல் களம்….!

தமிழக அரசியலில் சசிகலாவின் அடுத்தகட்ட நகர்வு என்னவாக இருக்கும் என்ற எதிர்பார்ப்பு நிலவி வரும் நிலையில், மதுரையில் ஒட்டப்பட்டுள்ள சுவரொட்டிகள் புதிய விவாதத்தை கிளப்பியுள்ளன. முன்னாள் முதல்வர் ஜெயலலிதாவின் நெருங்கிய தோழியான வி.கே. சசிகலா, விரைவில் தனிக்கட்சி தொடங்க உள்ளதாக மதுரையின் உசிலம்பட்டி, செக்கானூரணி உள்ளிட்ட பல்வேறு பகுதிகளில் அவரது ஆதரவாளர்கள் போஸ்டர் ஒட்டியுள்ளனர். இந்த போஸ்டர்கள் சமூக வலைதளங்களிலும் வேகமாகப் பரவி வருகின்றன.

முன்னாள் காவலரும், சசிகலாவின் தீவிர ஆதரவாளருமான ஒச்சாத்தேவர் என்பவரால் ஒட்டப்பட்டுள்ள இந்த போஸ்டர்களில், சசிகலா தனிக்கட்சி தொடங்குவது உறுதி என்பது போன்ற வாசகங்கள் இடம்பெற்றுள்ளன. குறிப்பாக, வரும் 2026-ம் ஆண்டு நடைபெறவுள்ள சட்டமன்றத் தேர்தலில் உசிலம்பட்டி தொகுதியில் சசிகலா போட்டியிடுவார் என்றும், அங்கு அவர் போட்டியின்றி வெற்றி பெறுவார் என்றும் அந்த போஸ்டர்களில் குறிப்பிடப்பட்டுள்ளது. இது அப்பகுதி மக்களிடையே ஆச்சரியத்தையும், அரசியல் கட்சியினரிடையே சலசலப்பையும் ஏற்படுத்தியுள்ளது.

அதிமுகவில் இருந்து ஓரங்கட்டப்பட்ட பிறகு, கட்சியை மீட்டெடுக்கும் முயற்சியில் சசிகலா ஈடுபட்டு வந்தாலும், தற்போதைய சூழலில் தனிக்கட்சி தொடங்குவது குறித்த ஆலோசனைகளை அவர் தனது ஆதரவாளர்களுடன் நடத்தி வருவதாகக் கூறப்படுகிறது. அதனை உறுதிப்படுத்தும் வகையிலேயே அவரது ஆதரவாளர்கள் இத்தகைய போஸ்டர் யுத்தத்தைத் தொடங்கியுள்ளனர். “வரும் தேர்தலில் சசிகலா தலைமையில் அவரது ஆதரவு பெற்ற வேட்பாளர்களை வெற்றியடையச் செய்வோம்” என்ற முழக்கங்கள் உசிலம்பட்டி பகுதியில் ஓங்கி ஒலிக்கத் தொடங்கியுள்ளன.

ஏற்கனவே தமிழக அரசியலில் நடிகர் விஜய்யின் தமிழக வெற்றிக் கழகம் உள்ளிட்ட புதிய வரவுகளால் களம் சூடுபிடித்துள்ள நிலையில், சசிகலாவின் இந்த புதிய முன்னெடுப்பு அதிமுக மற்றும் அமமுக வட்டாரங்களில் பெரும் தாக்கத்தை ஏற்படுத்தும் என எதிர்பார்க்கப்படுகிறது. உசிலம்பட்டியில் சசிகலா போட்டியிடுவாரா அல்லது இது வெறும் ஆதரவாளர்களின் ஆர்வமா என்பது வரும் நாட்களில் அவர் எடுக்கும் அதிகாரப்பூர்வ முடிவைப் பொறுத்தே அமையும்.