தோல்விகளைத் தகர்த்தெறிந்த துபாய் துணைத் தலைவர்: ஓர் இளம் இந்திய மென்பொறியாளரின் ஊக்கமளிக்கும் பயணம்!
“ஐஐடி (IIT) கனவு தகர்ந்துவிட்டால் வாழ்க்கையே முடிந்தது” என்று நினைக்கும் இன்றைய இளைஞர்களுக்கு மத்தியில், தன் அசாத்திய உழைப்பால் துபாய் வரை உயர்ந்து சாதனை படைத்துள்ளார் ஓர் இந்திய மென்பொறியாளர். எக்ஸ் (X) தளத்தில் நெட்டிசன் ஒருவர் பகிர்ந்துள்ள இவரது உணர்வுப்பூர்வமான கதை, பலரது கண்களைக் குளமாக்கியுள்ளதுடன், சோர்ந்துபோயிருக்கும் பலருக்கு புதிய நம்பிக்கையையும் தந்துள்ளது. ஐஐடி நுழைவுத் தேர்வில் ஒருமுறை அல்ல, இரண்டு முறை தோற்றுப்போனபோது, “இனி என் வாழ்க்கையில் என்ன இருக்கிறது? எல்லாம் முடிந்துவிட்டது” என்றுதான் அவருக்குத் தோன்றியது. ஒரு சிறிய ஊரில் பிறந்து வளர்ந்ததால், சுற்றியுள்ளவர்களின் ஒப்பீடுகளும், உறவினர்களின் ஏளனப் பார்வைகளும், பெற்றோருக்குத் தான் ஏற்படுத்திய ஏமாற்றமும் அந்தத் தோல்வியின் வலியை இன்னும் ரணமாக்கியது.
சொந்த ஊரின் ஏளனப் பார்வைகளில் இருந்து தப்பிக்க, வேறொரு நகரத்தில் இருந்த ஒரு அரசுப் பொறியியல் கல்லூரியில் அவர் சேர்ந்தார். ஆனால், அங்கும் பாதை எளிதாக இல்லை; குடும்பத்தின் பொருளாதாரச் சூழல் காரணமாக முழுக்க முழுக்கக் கல்விக்கடனை நம்பியே படிப்பைத் தொடங்கினார். அன்றாடச் செலவுகளுக்கும் சாப்பாட்டிற்கும் திண்டாடிய அவர், பள்ளி மாணவர்களுக்குக் கணிதம் சொல்லிக்கொடுத்து (Tuition) தன் தேவைகளைச் சமாளித்தார். சில நாட்கள் சாப்பாட்டுக்குக் கூடக் காசு இல்லாமல், வெறும் ஒன்று அல்லது இரண்டு சமோசாக்களை மட்டும் சாப்பிட்டுவிட்டு, பசியோடு இரவெல்லாம் விழித்திருந்து படித்த நாட்களை அவரால் இன்றும் மறக்க முடியவில்லை.
கல்லூரி படிப்பை முடித்தவுடன் அவருக்கு மாதச் சம்பளம் 20,000 ரூபாயில் ஒரு ஐடி சப்போர்ட் (IT Support) வேலை கிடைத்தது. அது தற்காலிக நிம்மதியைத் தந்தாலும், “உன் இலக்கு இதுவல்ல; குடும்பத்தின் தலையெழுத்தை மாற்ற வேண்டும்” என்ற வெறி அவருக்குள் ஓடிக்கொண்டே இருந்தது. இதனால் பகலில் ஆபீஸ் வேலை, இரவு முழுக்கப் படிப்பு எனத் தன் உழைப்பைத் தொடர்ந்தார். லட்சக்கணக்கில் பணம் கொடுத்துப் படிக்க வசதியோ, வழிகாட்ட எந்த மென்டாரோ இல்லாத சூழலில், இன்டர்நெட் மற்றும் தன் தீராத ஆர்வத்தை மட்டுமே மூலதனமாகக் கொண்டு, அப்போது வளர்ந்து வந்த செயற்கை நுண்ணறிவு (AI) மற்றும் மிஷின் லேர்னிங் (ML) துறைகளை அவரே சுயமாகப் படிக்கத் தொடங்கினார்.
அவரது விடாமுயற்சிக்குக் கிடைத்த பலனாக, ஒரு ஏஐ ப்ராஜெக்ட்டில் (AI Project) வேலை செய்யும் வாய்ப்பு கிடைத்தது; அதுவே அவரது வாழ்க்கையின் மிகப்பெரிய திருப்புமுனையாக அமைந்தது. அங்கிருந்து தயாரிப்பு மேலாண்மை (Product Management) மற்றும் வணிகத் தலைமைப் பொறுப்புகளுக்கு மெல்ல மெல்ல உயர்ந்தார். அன்று அவர் தோற்ற அதே ஆண்டில் ஐஐடி-க்குள் நுழைந்த தன் நண்பர்களுக்கு இணையாக, ஏன் சில இடங்களில் அவர்களை விடவும் சிறந்த வருமானத்தை இன்று அவர் ஈட்டி வருகிறார். இன்று அவர் துபாயில் உள்ள ஒரு முன்னணி நிறுவனத்தின் மிக இளம் வயது துணைக் தலைவராக (Vice President) அமர்ந்து உலகமே வியக்கும் வண்ணம் சாதித்துக் காட்டியுள்ளார்.
இன்று ஐஐடி, நீட் போன்ற நுழைவுத் தேர்வுகளில் தோற்றுப்போய், வாழ்க்கையே முடிந்தது என்று முடங்கிக்கிடக்கும் பல மாணவர்களுக்கும் இளைஞர்களுக்கும் இந்த இளம் துணைக் தலைவரின் வாழ்க்கை ஒரு சிறந்த பாடமாகும். ஒரு அசாதாரணமான வாழ்க்கையை நீங்கள் வாழ வேண்டும் என்றால், உங்களின் ஆரம்பம் மிகச் சரியானதாகவோ அல்லது பிரம்மாண்டமானதாகவோ இருக்க வேண்டிய அவசியமில்லை. நமக்குத் தேவை ஒன்றுதான் – எத்தனை முறை விழுந்தாலும் மீண்டு எழும் மன உறுதி மட்டுமே! ஒரு தேர்வு ஒருபோதும் உங்கள் ஒட்டுமொத்த வாழ்க்கையையும் தீர்மானிக்காது என்பதை உணர்ந்து, உங்களை நீங்களே செதுக்கிக்கொண்டால், காலம் உங்களுக்கான பாதையை நிச்சயம் திறக்கும்!
மாமல்லபுரம் அடுத்த பையனூர் ஓஎம்ஆர் சாலையில் நிகழ்ந்த கோர விபத்து அப்பகுதியில் பெரும் சோகத்தை ஏற்படுத்தியுள்ளது. வேகமாக வந்த வேனும்,…
வங்கக் கடலில் புதிய புயல் சின்னம் உருவாக வாய்ப்புள்ளதைத் தொடர்ந்து, தமிழகத்தின் பல்வேறு மாவட்டங்களுக்கு இந்திய வானிலை ஆய்வு மையம்…
மகாராஷ்டிரா மாநிலம் நாசிக் சிட்கோ பகுதியில் உள்ள ஒயின் ஷாப் ஒன்றில், பிரஷர் கன் மூலம் பாய்ந்த இரும்பு ஆணி…
தேசியவாத காங்கிரஸ் தலைவரும் மூத்த அரசியல்வாதியுமான சரத் பவாருக்கு அண்மையில் ஏற்பட்ட உடல்நலக் குறைவைத் தொடர்ந்து, அவருக்குப் பூரண ஓய்வளிக்க…
குஜராத் மாநிலம் சூரத் பகுதியில், வாங்கிய கடனைத் திருப்பிக் கொடுக்காததால் ஏற்பட்ட தகராறில் சக ஊழியரின் தலையைத் துண்டித்து மயானத்தில்…
பீகார் மாநிலம் பக்ஸார் மாவட்டத்தைச் சேர்ந்த ஊரக வளர்ச்சி அதிகாரி அல்பிதா சிங், கடந்த எட்டு மாதங்களாகத் தனக்கு சம்பளம்…