டிரம்ப் தலையில் விழுந்த பேரிடி..! ஈரானை நடுங்க வைத்த GBU-57 குண்டுகள் காலி… இன்னும் 6 தான் இருக்கு.. அமெரிக்காவின் ரகசிய ஆவணங்கள் கசிந்ததால் பரபரப்பு…!!

அமெரிக்காவின் வான்படை வசம் உள்ள மிகவும் சக்திவாய்ந்த ஆயுதமான GBU-57 எனப்படும் MOPs (Massive Ordnance Penetrator) குண்டுகள் குறித்த அதிர்ச்சிகரமான தகவல்கள் தற்போது வெளியாகியுள்ளன. சுமார் 13,607 கிலோ எடை கொண்ட இந்த நிலத்தடி ஊடுருவும் குண்டுகள், ஈரானின் நிலத்தடி அணுசக்தி தளங்களான ஃபோர்டோ மற்றும் நடான்ஸ் மீது கடந்த ஆண்டு ஜூன் மாதம் நடத்தப்பட்ட 12 நாள் போரின்போது முதல்முறையாகப் பயன்படுத்தப்பட்டன. அமெரிக்கா தன்னிடம் இருந்த 20 குண்டுகளில் 14-ஐ ஏற்கனவே இஸ்ரேலுக்கு ஆதரவாக ஈரான் மீது வீசிவிட்ட நிலையில், தற்போது வெறும் 6 குண்டுகள் மட்டுமே எஞ்சியிருப்பது அந்நாட்டு இராணுவத்திற்குப் பின்னடைவாகக் கருதப்படுகிறது.

கடந்த 30 ஆண்டுகளாக ஈரான் தனது ஏவுகணை பலத்தை நிலத்தடியில் மிகவும் பாதுகாப்பாகக் கட்டமைத்துள்ளது. இந்த நிலத்தடித் தளங்களை அழிக்கும் திறன் அமெரிக்காவின் இந்த சிறப்பு குண்டுகளுக்கு மட்டுமே உண்டு. தற்போது கசிந்துள்ள 8 பக்க அமெரிக்க விமானப்படை ஆவணங்களின்படி, ஈரானின் ஏவுகணை பலத்தை முறியடிக்க இந்த குண்டுகளின் தேவை முன்பை விட அதிகரித்துள்ளது. ஆனால், கையிருப்பில் உள்ள மிகக் குறைந்த எண்ணிக்கையிலான குண்டுகள் அமெரிக்காவின் போர் வியூகத்திற்குப் பெரும் சவாலாக மாறியுள்ளது.

ஈரான் மட்டுமின்றி, எதிர்காலத்தில் வடகொரியா அல்லது சீனா போன்ற நாடுகளுடன் மோதல் ஏற்படும் பட்சத்திலும் இந்த வகை குண்டுகள் அத்தியாவசியமானவை. ஏனெனில் அந்த நாடுகளும் தங்கள் அணு ஆயுதத் திட்டங்களை நிலத்தடியில் ரகசியமாகப் பாதுகாத்து வருகின்றன. அமெரிக்க அதிபர் டொனால்ட் ட்ரம்ப், நாட்டின் பாதுகாப்பு அரண் பலமாக இருப்பதாகவும், தேவையான ஆயுதங்கள் தயார் நிலையில் இருப்பதாகவும் கூறி வந்தாலும், கசிந்துள்ள இராணுவ ஆவணங்கள் ஆயுதத் தட்டுப்பாடு மற்றும் கூடுதல் தேவை குறித்த ஒரு நீண்ட பட்டியலையே முன்வைக்கின்றன.