முடிவுக்கு வந்த 35 ஆண்டுகால சாம்ராஜ்யம்…. அசெம்பிளிக்கு நோ எண்ட்ரி, மொத்தமே ரெண்டு தொகுதி… ஸ்டாலின் கண்ட முதல் தோல்வி…!

தமிழக அரசியல் வரலாற்றில் முப்பத்தைந்து ஆண்டுகளுக்குப் பிறகு, திமுக தலைவர் மு.க. ஸ்டாலின் ஒரு நேரடித் தேர்தலில் தோல்வியைத் தழுவியிருப்பது அரசியல் வட்டாரத்தில் பெரும் அதிர்வலைகளை ஏற்படுத்தியுள்ளது. கடந்த 1991-ம் ஆண்டுக்குப் பிறகு தான் சந்தித்த அனைத்து தேர்தல்களிலும் தொடர் வெற்றிகளைக் குவித்து வந்த ஸ்டாலின், 2026 சட்டமன்றத் தேர்தலில் தனது கோட்டையான கொளத்தூர் தொகுதியிலேயே வீழ்ந்திருப்பது திமுகவினரை நிலைகுலையச் செய்துள்ளது. தமிழகத்தில் ஒரு கட்சி தொடர்ந்து இரண்டாவது முறையாக ஆட்சி அமைக்க முடியாது என்ற அரசியல் சாபமும், இந்த தேர்தல் முடிவுகள் மூலம் மீண்டும் ஒருமுறை நிரூபிக்கப்பட்டுள்ளது.

முதல்வர் தொகுதி என்ற நட்சத்திர அந்தஸ்துடன், எண்ணற்ற நலத்திட்டங்கள் செயல்படுத்தப்பட்ட போதிலும், கொளத்தூர் தொகுதி வாக்காளர்கள் இந்த முறை மாற்றத்தை விரும்பியுள்ளனர். முதன்முறையாக தேர்தல் களத்தில் குதித்த விஜய்யின் தமிழக வெற்றிக் கழகம் சார்பில் போட்டியிட்ட வி.எஸ். பாபு, சுமார் 6 ஆயிரம் வாக்குகள் வித்தியாசத்தில் முதலமைச்சர் ஸ்டாலினைத் தோற்கடித்து சாதனை படைத்துள்ளார். அசுர பலம் கொண்ட ஆளுங்கட்சியின் தலைவரை, ஒரு புதிய கட்சியின் வேட்பாளர் வீழ்த்தியது தமிழக அரசியலில் ஒரு புதிய சகாப்தத்தின் தொடக்கமாகப் பார்க்கப்படுகிறது.

ஸ்டாலினின் தேர்தல் பயணத்தை திரும்பிப் பார்த்தால், 1984-ல் ஆயிரம் விளக்கு தொகுதியில் தொடங்கி பல ஏற்ற இறக்கங்களைச் சந்தித்துள்ளார். 1989-ல் முதல் வெற்றி, 1991-ல் தோல்வி எனத் தொடங்கிய அவரது பயணம், அதன் பிறகு ஏறுமுகமாகவே இருந்தது. 1996, 2001, 2006 என ஆயிரம் விளக்கிலும், அதன் பின்னர் 2011 முதல் தொடர்ந்து மூன்று முறை கொளத்தூரிலும் வென்று அசைக்க முடியாத தலைவராக உருவெடுத்தார். இடையில் சென்னை மாநகராட்சி மேயராக மக்களால் நேரடியாகத் தேர்ந்தெடுக்கப்பட்டு நிர்வாகத் திறமையையும் நிரூபித்திருந்தார்.

தேசிய அரசியலில் பாஜகவிற்கு எதிராக வலுவான குரலாக ஒலிக்கும் ஒரு தலைவர், தனது சொந்த மாநிலத்தில், அதுவும் முதலமைச்சராகப் பதவிக்காலத்தை நிறைவு செய்த கையோடு தோல்வியைச் சந்திப்பது அவரது அரசியல் வாழ்க்கையில் மிகப்பெரிய கரும்புள்ளியாகக் கருதப்படுகிறது. 1991-க்கு பிறகு சுமார் 35 ஆண்டுகள் தோல்வியே அறியாத நாயகனாக வலம் வந்த ஸ்டாலினுக்கு, 2026 தேர்தல் முடிவுகள் ஒரு கசப்பான அனுபவத்தையும், தமிழக அரசியலில் ஏற்பட்டுள்ள புதிய மாற்றத்திற்கான அறிகுறியையும் வெளிப்படுத்தியுள்ளது.