ரூ.3 கோடி வேலை மோசடி வழக்கு… முன்னாள் அமைச்சர் ராஜேந்திர பாலாஜிக்கு செப். 2-ல் சிக்கல்…. அதிமுகவுக்கு அடுத்த ஷாக்….!

ஆவின் உள்ளிட்ட அரசுத் துறைகளில் வேலை வாங்கித் தருவதாகக் கூறி ரூ.3 கோடி மோசடி செய்த வழக்கில், முன்னாள் அமைச்சர் கே.டி. ராஜேந்திர பாலாஜியின் விடுவிப்பு மனுவை ஸ்ரீவில்லிபுத்தூர் நீதிமன்றம் தள்ளுபடி செய்துள்ளது. கடந்த அதிமுக ஆட்சிக்காலத்தில் நடந்ததாகக் கூறப்படும் இந்த முறைகேடு புகாரின் பேரில், ராஜேந்திர பாலாஜி மற்றும் அவரது உதவியாளர்கள் உட்பட 8 பேர் மீது விருதுநகர் மாவட்டக் குற்றப்பிரிவு போலீசார் இரு வழக்குகளைப் பதிவு செய்திருந்தனர்.

இந்த வழக்குகளின் விசாரணை ஸ்ரீவில்லிபுத்தூரில் உள்ள மக்கள் பிரதிநிதிகள் மீதான ஊழல் தடுப்பு சிறப்பு நீதிமன்றத்தில் நடைபெற்று வரும் நிலையில், தங்களை இவ்வழக்குகளிலிருந்து விடுவிக்கக் கோரி ராஜேந்திர பாலாஜி தரப்பில் மனு தாக்கல் செய்யப்பட்டது. கடந்த 10 மாதங்களாக நடைபெற்று வந்த இந்த விசாரணையில் இரு தரப்பு வாதங்களையும் கேட்டறிந்த முதன்மை மாவட்ட அமர்வு நீதிபதி கந்தகுமார், தற்போது அந்த விடுவிப்பு மனுவை அதிகாரப்பூர்வமாகத் தள்ளுபடி செய்துள்ளார்.

இதனைத் தொடர்ந்து, இந்த மோசடி வழக்குகள் தொடர்பான குற்றச்சாட்டுப் பதிவை செப்டம்பர் 2 ஆம் தேதிக்குள் மேற்கொள்ள வேண்டும் என்று குற்றப்பிரிவு காவல்துறைக்கு நீதிமன்றம் உத்தரவிட்டுள்ளது. முன்னாள் அமைச்சர் மீதான இந்த ஊழல் மற்றும் மோசடி வழக்கில் விரைவில் குற்றச்சாட்டுக்கள் பதிவு செய்யப்பட உள்ளதால், இவ்வழக்கின் விசாரணை அடுத்த கட்டத்தை நோக்கி நகர்ந்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது.