“சென்னையில் பயங்கரம்: ரேபிடோ பைக்கில் அலுவலகம் சென்ற ஐடி பெண் ஊழியர்.. கார் மோதி பலி…!”

சமீபகாலமாகவே சாலைகளில் வாகனங்களின் வேகம் அதிகரித்து, விபத்துக்களும் தொடர்கதையாகி வருகின்றன. பைக் மற்றும் கார்களில் செல்பவர்கள் போதிய நிதானமின்றி, அதீத வேகத்தில் வாகனங்களை இயக்குவதால் பல இன்னுயிர்கள் பறிபோகின்றன. இந்த அஜாக்கிரதைக்குச் சம்பந்தமே இல்லாத அப்பாவி பொதுமக்களும், பாதசாரிகளும் பலியாவது பெரும் சோகத்தை ஏற்படுத்தி வருகிறது. அந்த வகையில், சென்னையில் தற்போது பைக்கில் பயணித்த இளம்பெண் ஒருவர் கார் மோதி உயிரிழந்த சம்பவம் அதிர்ச்சியை ஏற்படுத்தியுள்ளது.

சென்னை கொளத்தூரைச் சேர்ந்த கோமதி என்ற இளம்பெண், ராமாபுரம் பகுதியில் உள்ள ஒரு ஐடி நிறுவனத்தில் பணியாற்றி வந்தார். அவர் இன்று காலை எப்போதும் போல தனது பணிக்குச் செல்வதற்காக ரேபிடோ பைக் புக் செய்து அதில் பயணித்துள்ளார். வானகரம் அருகே அவர்கள் சென்று கொண்டிருந்தபோது, பின்னால் எதிர்பாராத விதமாக மிக வேகமாக வந்த கார் ஒன்று, இவர்கள் சென்ற பைக் மீது பலமாக மோதிவிட்டு நிற்காமல் தப்பிச் சென்றுள்ளது.

இந்த கொடூர விபத்தில் பைக் ஓட்டுநரின் கட்டுப்பாட்டை இழந்து தூக்கி வீசப்பட்ட கோமதி, சம்பவ இடத்திலேயே பரிதாபமாக உயிரிழந்தார். படுகாயமடைந்த ரேபிடோ பைக் ஓட்டுநர் மீட்கப்பட்டு, தற்போது மருத்துவமனையில் தீவிர சிகிச்சை பெற்று வருகிறார். இதுகுறித்து வழக்குப் பதிவு செய்துள்ள போலீசார், விபத்தை ஏற்படுத்திவிட்டு தப்பியோடிய காரை ஓட்டியது யார் என்று தீவிர விசாரணையில் இறங்கியுள்ளனர். அப்பகுதியில் உள்ள சிசிடிவி கேமரா காட்சிகளை ஆய்வு செய்து, காரின் எண்ணை வைத்து குற்றவாளியைப் பிடிப்பதற்கான நடவடிக்கைகளை மேற்கொண்டு வருகின்றனர்.