நான் காப்பி அடித்தேனா?… டேய் நான் உன்னை பயிற்றுவித்தேன்… காப்பியடித்ததாக எழுந்த குற்றச்சாட்டுக்கு இளையராஜா பதில்!

இன்றைக்கு உலகில் இருக்கும் இசையமைப்பாளர்களில் வயதிலும் அனுபவத்திலும் மூத்தவராக இருக்கிறார் இளையராஜா. இப்போதும் தன்னுடைய 82 ஆவது  வயதில் பிஸியாக பல படங்களுக்கு இசையமைத்து வருகிறார். இதுவரை அவர் 1200 படங்களுக்கு இசையமைத்துள்ளதாக சொல்லப்படுகிறது. இது தவிர இசைக் கச்சேரிகளை உலகம் முழுவதும் நடத்தியுள்ளார்.

தமிழ் சினிமாவில் பல ஜாம்பவான் இசையமைப்பாளர்கள் உருவாகியுள்ளார்கள். ஆனால் அவர்களுக்கும் இளையராஜாவுக்கும் இடையே உள்ள பெரிய வித்தியாசமே பின்னணி இசையில் இளையராஜாவுக்கு நிகர் அவர் மட்டுமே. அவரின் வருகைக்குப் பிறகே தமிழ் சினிமாவில் பின்னணி இசையை இயக்குனர்கள் உணர ஆரம்பித்தார்கள் என்றால் அது மிகையாகாது.

இதையடுத்து இப்போது இளையராஜா தற்போது தன்னுடைய ‘valiant’ என்ற முதல் சிம்ஃபொனியை நிகழ்த்த உள்ளார். அதற்கான ஒத்திகை வீடியோக்கள் இணையத்தில் வெளியாகி கவனம் பெற்றன. இதையடுத்து பல இணையச் சேனல்களில் இளையராஜா நேர்காணல்கள் கொடுத்து வருகிறார்.

அதில் ஒரு நேர்காணலில் தான் மேற்கத்திய இசையின் ஜாம்பவான்களான மொசார்ட் மற்றும் பாஹ் போன்றவர்களின் இசையில் இருந்து காப்பி அடித்ததாக எழுந்த குற்றச்சாட்டுகளுக்குப் பதிலளித்துள்ளார். அதில் “நான் காப்பி அடித்துவிட்டதாக சொல்கிறார்கள். அதுவும் எப்போது? 50 ஆண்டுகள் கழித்து.

டேய் நான் உனக்கு உலகில் இப்படி எல்லாம் இசை இருக்கிறது. இதையெல்லாம் நீ கேட்கவேண்டும் என்பதற்காக நான் எடுத்துக் காட்டினேன். அதுவும் ஒரு நிமிடத்துக்கு… மீதி இசையை யார்  அந்த ஜாம்பவானா போட்டார்? நான் உனக்கு இப்படி எல்லாம் இசை இருக்கிறது என்று பயிற்றுவித்தேன். நான் சொலல்வில்லை என்றால் உனக்கு மொசார்ட், பாஹ் மற்றும் பீத்தோவான் பற்றி எல்லாம் தெரிந்திருக்குமா?.. உன் வாத்தியார் சொன்னாரா உனக்கு மொசார்ட் பற்றி. நான்தானே சொன்னேன்” என ஆவேசமாகப் பேசியுள்ளார்.