மனைவி மீது சந்தேகம்… கோபத்தில் செய்த விபரீதம்… பெண்ணின் அந்தரங்கப் படங்களை… இணையத்தில் கசியவிட்ட கணவன் – பகீர் பின்னணி…!

பீகார் மாநிலம் கட்டிஹார் மாவட்டத்தில், தனது மனைவியின் அந்தரங்க மற்றும் ஆட்சேபனைக்குரிய புகைப்படங்களை சமூக வலைதளங்களில் பகிர்ந்த குற்றத்திற்காக தயாந்த் குமார் என்ற நபர் சைபர் கிரைம் போலீசாரால் கைது செய்யப்பட்டுள்ளார். கடந்த 2023-இல் திருமணமான இவருக்கு, தன் மனைவி வேறொரு நபருடன் தகாத உறவில் இருப்பதாக தீவிர சந்தேகம் இருந்துள்ளது. இதன் காரணமாக, மனைவியின் மீது அவதூறு பரப்ப வேண்டும் என்ற நோக்கத்தில் அவரது தனிப்பட்ட புகைப்படங்கள் மற்றும் வீடியோக்களை சமூக வலைதளங்களில் பதிவிட்டுவிட்டு தயாந்த் குமார் சில மாதங்கள் தலைமறைவாகியுள்ளார்.

பாதிக்கப்பட்ட பெண் அளித்த புகாரின் பேரில் போலீசார் தீவிரமாக தேடி வந்த நிலையில், தலைமறைவாக இருந்த தயாந்த் குமார் பிடிபட்டார். கைதான பின்னர் போலீசாரிடம் தனது குற்றத்தை ஒப்புக்கொண்ட அவர், தன் மனைவிக்கு திருமணத்திற்கு புறம்பான உறவு இருந்ததாகவும், அவர் வேறொரு நபருடன் ஓடிவிட்டதாக நினைத்த கோபத்தில் இந்த காரியத்தைச் செய்ததாகவும் கூறியுள்ளார். மேலும், “நான் பெரும் தவறு செய்துவிட்டேன்” என்றும் விசாரணையின் போது அவர் தெரிவித்துள்ளார்.

கைது செய்யப்பட்ட தயாந்தின் கைபேசியை பறிமுதல் செய்த போலீசார், அதில் இருந்த ஆட்சேபனைக்குரிய புகைப்படங்களை தடயவியல் சோதனைக்கு அனுப்பியுள்ளனர். இந்தத் தரவுகள் வேறு எங்கும் பகிரப்பட்டுள்ளதா அல்லது அழிக்கப்பட்டுள்ளதா என்பது குறித்து விசாரணை நடத்தப்பட்டு வருகிறது. சமூக ஊடகங்களில் இது போன்ற சட்ட விரோத செயல்களில் ஈடுபடுபவர்கள் மீது கடுமையான நடவடிக்கை எடுக்கப்படும் என்று கூறியுள்ள சைபர் டிஎஸ்பி ஆசிஃப் ஆலம், குற்றஞ்சாட்டப்பட்ட நபர் நீதிமன்ற காவலில் சிறைக்கு அனுப்பப்படுவார் என்று தெரிவித்துள்ளார்.