“அடி மேல் அடி…” 5 முறை தோல்வி… தளராத இளம்பெண்… தந்தையின் மரணம்… சோகங்களைத் தாண்டி 6-வது முயற்சியில் மாஸ் வெற்றி… ஐ.ஏ.எஸ் சாதனை… அசத்தலான பயணம்…!

இளவயதுத் திருமணமும் தாய்மையும் எந்தவொரு லட்சியத்திற்கும் தடையாக இருக்க முடியாது என்பதைத் தனது அசாத்திய விடாமுயற்சியால் நிரூபித்துள்ளார் ஐ.ஏ.எஸ் அதிகாரியான மின்னு பி.எம். கேரள மாநிலம் பத்தனம்திட்டாவைச் சேர்ந்த இவர், தனது தந்தையின் அகால மரணத்திற்குப் பிறகு வாரிசு அடிப்படையில் கேரள காவல்துறைத் துறையில் கிளார்க் பணியில் இணைந்தார். தனது தந்தையின் கனவை நனவாக்க விரும்பிய அவர், தனது 21-வது வயதில் திருமணமும், 23-வது வயதில் தாய்மையையும் கடந்த நிலையிலும் படிப்பைக் கைவிடவில்லை. தன் மீதான குடும்பப் பொறுப்புகளையும் அலுவலகப் பணியையும் திறம்படச் சமாளித்தபடியே தன் சிவில் சர்வீஸ் கனவுக்காக தீவிரமாக உழைக்கத் தொடங்கினார்.

https://twitter.com/DrChiruTweets/status/2081901384098808109/photo/1

தொடர்ந்து ஐந்து முறை தோல்விகளைச் சந்தித்தாலும் மனம் தளராத மின்னு, ஆறாவது முயற்சியில் அகில இந்திய அளவில் 150-வது ரேங்க் பெற்று சாதனை படைத்தார். அதிகாலை நள்ளிரவு பாராமல் படித்து, கடுமையான போராட்டங்களுக்குப் பின் தனது 32-வது வயதில் அவர் அடைந்த இந்த வெற்றி பல இளைஞர்களுக்கு, குறிப்பாகப் பெண்களுக்கு ஒரு மிகப்பெரிய உத்வேகமாக அமைந்துள்ளது. தற்போது மகாராஷ்டிராவின் அமராவதி மாவட்டத்தில் உள்ள பட்குலி-திவாசா துணைப் பிரிவின் உதவி ஆட்சியராகப் பணியாற்றி வரும் இவரது ஊக்கமளிக்கும் பயணம், லட்சியத்தை அடைய உறுதியும் கடின உழைப்பும் மட்டுமே முக்கியம் என்பதை உலகிற்குப் பறைசாற்றுகிறது.