பகீர்… அமாவாசை இரவில் நடந்த கொடூரம்: 6 வயது பேரனை நரபலி கொடுத்த பாட்டி..? வேலூரில் பரபரப்பு…!!

வேலூர் மாவட்டம் பேரணாம்பட்டு அருகே, பெற்றோர் பிரிந்து வாழ்ந்ததால் கடந்த 40 நாட்களாகத் தந்தை வழிப் பாட்டி விஜயாவின் வீட்டில் வளர்ந்து வந்த 6 வயது சிறுவன் முகிலன் மர்மமான முறையில் உயிரிழந்துள்ளான். சிறுவன் உடல்நலக்குறைவால் இறந்ததாகக் கூறி அவனது சடலத்தை வீட்டில் வைத்திருந்த நிலையில், முந்தைய நாள் வரை நன்றாக இருந்த சிறுவனின் மரணத்தில் அக்கம்பக்கத்தினருக்குச் சந்தேகம் எழுந்தது. இதுகுறித்து அவர்கள் அளித்த தகவலின் பேரில் விரைந்து வந்த மேல்பட்டி போலீஸார், சிறுவனின் உடலை மீட்டுப் பிரேத பரிசோதனைக்காகக் குடியாத்தம் அரசு மருத்துவமனைக்கு அனுப்பி வைத்தனர்.

சிறுவனின் தந்தை வழிப் பாட்டி விஜயா மற்றும் அவரது மகள் ரேவதி ஆகியோர் தொடர்ந்து மாந்திரீகச் செயல்களில் ஈடுபட்டு வந்ததாக அப்பகுதி மக்கள் குற்றம் சாட்டுகின்றனர். அமாவாசை தினமான முந்தைய நாள் இரவில் அவர்கள் சிறுவனை நரபலி கொடுத்திருக்கலாம் என்று அஞ்சுவதாகவும், இதனாலேயே சிறுவனின் மரணம் குறித்து அவர்கள் முன்னுக்குப் பின் முரணாகப் பதிலளித்ததாகவும் பொதுமக்கள் தெரிவித்துள்ளனர். இச்சம்பவம் அப்பகுதியில் பெரும் அச்சத்தையும் பரபரப்பையும் ஏற்படுத்தியுள்ளது.

இதற்கிடையில், சிறுவனின் தாய் வழிப் பாட்டி விஜயா பேசுகையில், குழந்தையின் உடலில் பல காயங்கள் இருந்ததாகவும், முகம் சிதைந்த நிலையில் காணப்பட்டதாகவும் தெரிவித்துள்ளார். மேலும், பிரேத பரிசோதனை அறிக்கையில் சிறுவன் அடித்துக் கொலை செய்யப்பட்டுள்ளதாகத் தகவல் வந்துள்ளதால், அவனது தந்தை வழிப் பாட்டி மீது 100 சதவீதம் சந்தேகம் இருப்பதாகக் கூறி அவரை உடனடியாகக் கைது செய்யக் கோரியுள்ளார். இப்புகார்களின் அடிப்படையில் பாட்டி விஜயா மற்றும் அவரது மகள் ரேவதியிடம் மேல்பட்டி போலீஸார் தீவிர விசாரணை நடத்தி வருகின்றனர்.