21 நாட்களில் இனி எல்லாமே மாறும்…. தமிழக அரசு போட்ட அந்த ஒற்றை கையெழுத்து…. விஜய் அரசின் அதிரடி மூவ்…. ஆளுநர் அர்லேகர் சிக்னல் கொடுத்ததன் ரகசியம்….!

தமிழ்நாட்டில் தொழில் முதலீடுகளை ஈர்ப்பதையும், புதிய தொழில் திட்டங்களை விரைவாகச் செயல்படுத்துவதையும் நோக்கமாகக் கொண்டு கொண்டுவரப்பட்ட தமிழ்நாடு வணிக எளிதாக்கல் (திருத்த) சட்டம், 2026-க்கு ஆளுநர் ஆர்.வி. அர்லேகர் ஒப்புதல் அளித்துள்ளார். இது தொடர்பான அதிகாரப்பூர்வ அறிவிப்பு மாநில அரசிதழிலும் வெளியிடப்பட்டு, உடனடியாகச் சட்ட வடிவம் பெற்றுள்ளது. மாநிலத்தில் முதலீட்டுச் சூழலை மேலும் சுலபமாக்கி, புதிய நிறுவனங்கள் தொடங்குவதில் ஏற்படும் தேவையற்ற காலதாமதத்தைத் தவிர்ப்பதே இந்தச் சட்டத் திருத்தத்தின் முதன்மை நோக்கமாகும்.

இச்சட்டத் திருத்தத்தின் மிக முக்கிய அம்சமாக, அரசுத் துறை சான்றிதழ்கள் மற்றும் அனுமதிகளை வழங்குவதற்கான காலவரம்பில் அதிரடி மாற்றம் செய்யப்பட்டுள்ளது. தொழில் தொடங்குவதற்குத் தேவையான அனுமதிகளைப் பெற 21 நாட்களுக்கு மேலாகக் குறிப்பிடப்பட்டிருந்தாலோ அல்லது காலக்கெடு எதுவும் குறிப்பிடப்படாமல் இருந்தாலோ, அவை அனைத்தும் அதிகபட்சமாக 21 நாட்களுக்குள் வழங்கி முடிக்கப்பட வேண்டும் எனக் நிர்ணயிக்கப்பட்டுள்ளது. பொது மற்றும் உள்ளூர் விடுமுறை நாட்கள் தவிர்த்து கணக்கிடப்படும் இந்த 21 நாள் கெடு நடைமுறை, முதலீட்டாளர்களுக்கு விரைவான மற்றும் நம்பகமான சேவைக்கு வழிவகுக்கும்.

மேலும், மாநிலத்தில் பெருந்திட்ட முதலீடுகளைக் கண்காணித்து விரைவுபடுத்த “தமிழ்நாடு முதலீட்டு ஊக்குவிப்பு ஆணையம்” என்ற உயர்நிலைக் கட்டமைப்பு உருவாக்கப்படுகிறது. தலைமைச் செயலாளர் தலைவராகவும், தொழில்துறைச் செயலாளர் உறுப்பினர்-ஒருங்கிணைப்பாளராகவும் செயல்படும் இந்த ஆணையத்தில் அதிகபட்சமாக 20 உறுப்பினர்கள் இடம்பெறுவர். ரூ.200 கோடிக்கும் அதிகமான மூலதன முதலீடு, 5,000-க்கும் மேற்பட்டோருக்கு வேலைவாய்ப்பு, வெளிநாட்டுத் தமிழர்களின் முதலீடுகள் மற்றும் சுதந்திர வர்த்தக ஒப்பந்தம் சார்ந்த திட்டங்களை இந்த ஆணையம் நேரடியாகக் கண்காணித்து அனுமதி நடைமுறைகளை துரிதப்படுத்தும்.

திட்டம் தொடங்கும் முன்பான ஆரம்பக் கட்டம் முதல் வணிக ரீதியிலான உற்பத்தி தொடங்கும் வரை அனைத்துச் செயல்பாடுகளையும் தொடர்ந்து ஆய்வு செய்யும் அதிகாரம் இந்த ஆணையத்திற்கு வழங்கப்பட்டுள்ளது. அரசு அனுமதிகள் மற்றும் சலுகைகள் தடையின்றி கிடைப்பதை உறுதி செய்யச் சம்பந்தப்பட்ட துறைகளுக்கு நேரடியாக உத்தரவிடவும், தொழில் பயன்பாட்டிற்காக ஒதுக்கப்பட்டுப் பயன்படுத்தப்படாமல் உள்ள நிலங்களை மறுஆய்வு செய்யவும் ஆணையத்திற்கு அதிகாரம் அளிக்கப்பட்டுள்ளது. தொழில்துறை வளர்ச்சியை அடுத்த கட்டத்திற்கு எடுத்துச் செல்லவும், புதிய வேலைவாய்ப்புகளை உருவாக்கவும் இந்தச் சட்டத் திருத்தம் பெரும் உறுதுணையாக இருக்கும் எனக் கருதப்படுகிறது.