வளைகுடாவுக்கு குட்பை.. அமெரிக்காவுக்கு வெல்கம்… இந்திய நகை ஜாம்பவான்களின் மெகா ‘ரூட்’ மாற்றம்….பின்னணியில் இப்படியொரு ரகசியமா?

மேற்கு ஆசிய நாடுகளில் நிலவி வரும் போர் பதற்றம் காரணமாக, வளைகுடா நாடுகளில் கிளைகளைக் கொண்டுள்ள முன்னணி இந்திய நகை நிறுவனங்களான மலபார் கோல்ட், கல்யாண் ஜூவல்லர்ஸ், ஜாய் ஆலுக்காஸ் மற்றும் தனிஷ்க் ஆகியவை கடுமையான விற்பனை சரிவைச் சந்தித்து வருகின்றன. கடந்த ஆண்டு மார்ச் மாதத்துடன் ஒப்பிடுகையில், தற்போது விற்பனை சுமார் 70% வரை குறைந்துள்ளதாக அதிர்ச்சியூட்டும் புள்ளிவிவரங்கள் வெளியாகியுள்ளன. போர் சூழலால் மக்கள் அத்தியாவசியத் தேவைகளுக்கு மட்டுமே முன்னுரிமை அளிப்பதாலும், சுற்றுலாப் பயணிகளின் வருகை கணிசமாகக் குறைந்ததாலும் ஷோரூம்கள் வாடிக்கையாளர்கள் இன்றி வெறிச்சோடிக் காணப்படுகின்றன.

வளைகுடா நாடுகளின் நகை விற்பனையில் முதுகெலும்பாகத் திகழும் இந்தியர்கள் உள்ளிட்ட ஆசிய நாடுகளைச் சேர்ந்தவர்கள், தற்போதைய நிச்சயமற்ற சூழலில் நகைகளில் முதலீடு செய்யத் தயக்கம் காட்டி வருகின்றனர். ஆபரணத் தங்கத்தை வாங்குவதைத் தவிர்த்து, பாதுகாப்பான முதலீடாகக் கருதப்படும் தங்கக் காசுகள் மற்றும் கட்டிகளை (Bullion) வாங்குவதிலேயே மக்கள் அதிக ஆர்வம் காட்டுகின்றனர். இதனால் டிசைன் நகைகளுக்கான தேவை பெருமளவு சரிந்துள்ளதோடு, நகை நிறுவனங்களின் வருவாயிலும் பெரிய பாதிப்பு ஏற்பட்டுள்ளது.

சுமார் 2 பில்லியன் டாலர் மதிப்புள்ள வளைகுடா நகை சந்தையில் இந்திய நிறுவனங்களின் ஆதிக்கம் அதிகம் என்றாலும், தற்போதைய நெருக்கடியால் அவற்றின் விரிவாக்கத் திட்டங்களுக்கு ‘பிரேக்’ விழுந்துள்ளது. ஜாய் ஆலுக்காஸ் குழுமத்தின் தலைவர் ஜாய் ஆலுக்காஸ் இதுகுறித்துக் கூறுகையில், போர் தொடங்கிய முதல் வாரம் நிலைமை மிகவும் மோசமாக இருந்ததாகவும், கடைகள் திறந்திருந்தாலும் விற்பனை இன்னும் பழைய நிலைக்கு வரவில்லை என்றும் வருத்தத்துடன் தெரிவித்துள்ளார். தனிஷ்க் போன்ற நிறுவனங்கள் சில பகுதிகளில் ஈத் பண்டிகை விற்பனை ஓரளவுக்குக் கைகொடுத்தாலும், ஒட்டுமொத்த சந்தை நிலவரம் மந்தமாகவே இருப்பதாகக் குறிப்பிட்டுள்ளன.

இந்த இக்கட்டான சூழலைச் சமாளிக்க, இந்திய நகை நிறுவனங்கள் இப்போது வளைகுடா நாடுகளுக்குப் பதிலாக அமெரிக்கா மற்றும் தூர கிழக்கு ஆசிய நாடுகளின் (Far East) பக்கம் தங்கள் கவனத்தைத் திருப்பத் தொடங்கியுள்ளன. ஆண்டு வருவாயில் 20% முதல் 25% வரை வளைகுடா நாடுகளைச் சார்ந்திருக்கும் இந்தத் துறை, மற்ற எஃப்.எம்.சி.ஜி நிறுவனங்களை விடவும் போரினால் அதிகப் பாதிப்பைச் சந்தித்துள்ளது. போர் மேகங்கள் விலகி, அமைதி திரும்பினால் மட்டுமே தங்கம் மீண்டும் பழையபடி ஜொலிக்கும் என எதிர்பார்க்கப்படுகிறது.