“100 போலீசார், 11 நாட்கள் தேடியும் சிக்காத சிறுமி”…. செஞ்சி மாயமான விவகாரத்தில் சிபிசிஐடி கையில் எடுத்த திடுக்கிடும் ரகசியம்….. தமிழக அரசு கொடுத்த பரபரப்பு விளக்கம்…!

விழுப்புரம் மாவட்டம் செஞ்சி அருகே உள்ள நடுப்பட்டு கிராமத்தைச் சேர்ந்த இரண்டாம் வகுப்பு மாணவி ஹேமலதா, கடந்த அக்டோபர் 12 அன்று அதிகாலை முதல் மாயமான சம்பவம் அப்பகுதியில் பெரும் அதிர்ச்சியை ஏற்படுத்தியுள்ளது. கடந்த அக்டோபர் 11 அன்று தனது பிறந்தநாளைக் கொண்டாடிய சிறுமி, இரவு குடும்பத்தினருடன் தூங்கச் சென்ற நிலையில், அதிகாலை 6 மணியளவில் திடீரென மாயமாகியுள்ளார். இதுகுறித்து குடும்பத்தினர் அளித்த புகாரின் அடிப்படையில், காவல்துறையினர் தீவிர தேடுதல் வேட்டையில் இறங்கினர்.

சிறுமி மாயமானதைக் கண்டுபிடிக்க 100-க்கும் மேற்பட்ட காவல்துறையினர், தீயணைப்பு மற்றும் மீட்புப் படையினர், தடயவியல் நிபுணர்கள் இணைந்து 11 நாட்களாக தீவிர தேடுதல் பணியில் ஈடுபட்டனர். ட்ரோன்கள், வெப்பக் கண்காணிப்புக் கருவிகள் மற்றும் மோப்ப நாய்கள் உதவியுடன் கிணறுகள், நீர்நிலைகள், விவசாய நிலங்கள் மற்றும் மலைப்பகுதிகளில் தேடியும் எவ்விதத் தடயமும் கிடைக்கவில்லை. மேலும், ஆலம்பூண்டி, திருவண்ணாமலை மற்றும் நடுப்பட்டு சாலைகளில் உள்ள சிசிடிவி பதிவுகள் மற்றும் 600-க்கும் மேற்பட்ட செல்போன் டவர் பதிவுகள் தீவிரமாக ஆய்வு செய்யப்பட்டன.

இவ்வழக்கின் தீவிரத்தலைக் கருத்தில் கொண்டு, தமிழ்நாடு காவல்துறை தலைமை இயக்குநரின் உத்தரவின்பேரில் வழக்கு குற்றப்பிரிவு குற்றப் புலனாய்வுத் துறைக்கு (CB-CID) மாற்றப்பட்டு, தற்போது விசாரணை அதிகாரிகளிடம் ஆவணங்கள் ஒப்படைக்கப்பட்டுள்ளன. உள்ளூர் மற்றும் அருகிலுள்ள கிராமங்களைச் சேர்ந்தவர்கள், குற்றப் பின்னணி உள்ளவர்கள் மற்றும் போக்சோ வழக்குகளில் தொடர்புடையவர்கள் குறித்தும் போலீசார் விரிவான விசாரணை நடத்தி வருகின்றனர்.

சிறுமி மாயமான இந்தச் சம்பவம் தற்செயலானது அல்லாமல், திட்டமிட்டு நடத்தப்பட்டிருக்கலாம் என்று மூத்த காவல்துறை அதிகாரி ஒருவர் சந்தேகம் தெரிவித்துள்ளார். ஒரு கும்பல் சிறுமியைக் கடத்திச் சென்றதா என்பது குறித்த கோணத்திலும் விசாரணை முடுக்கிவிடப்பட்டுள்ளது. தன் மகளுக்கு நேர்ந்தது என்னவென்று தெரியாமல் தவிக்கும் குடும்பத்தினருக்கு நீதி வழங்கும் வகையில், CB-CID காவல்துறையினர் அனைத்துக் கோணங்களிலும் தங்கள் விசாரணையைத் தீவிரப்படுத்தியுள்ளனர்.