கைத்தடியுடன் கோர்ட்டுக்கு வந்த ஜெம் வீரமணி…. சென்னை POCSO நீதிமன்றத்தில் திடீர் பரபரப்பு…. அடுத்தடுத்த வெளிவரும் திடுக்கிடும் உண்மை….!

சிறுமிகளை பாலியல் வன்கொடுமை செய்த வழக்கில் கைது செய்யப்பட்டுள்ள தொழிலதிபர் ஜெம் வீரமணி சென்னை போக்சோ சிறப்பு நீதிமன்றத்தில் இன்று நேரில் ஆஜர்படுத்தப்பட்டார். கல்வி நிதி உதவி பெற வரும் சிறுமிகளைப் பாலியல் ரீதியாகத் துன்புறுத்தியதாக எழுந்த குற்றச்சாட்டின் அடிப்படையில், ஜெம் கிரானைட்ஸ் நிறுவன உரிமையாளர் வீரமணி, அவருக்கு உடந்தையாக இருந்த சாந்தி, மகேந்திர சிம்ஹன் மற்றும் கணேசன் உள்ளிட்டோர் கைது செய்யப்பட்டனர். பல தகவல்கள் வெளியாகித் தமிழகத்தையே உலுக்கியுள்ள இந்த வழக்கை, டிஜிபி உத்தரவின்படி சிறப்பு புலனாய்வுக் குழு அமைத்து தீவிரமாக விசாரணை நடத்தி வருகிறது.

முன்னதாக ஜெம் வீரமணியின் 14 நாள் நீதிமன்றக் காவல் முடிந்த நிலையில், பாதுகாப்பு காரணங்களைக் கருத்தில் கொண்டு அவர் காணொலி காட்சி மூலமாகவே நீதிமன்றத்தில் ஆஜர்படுத்தப்பட்டார். அப்போது அவரது நீதிமன்றக் காவலை நீட்டித்து நீதிபதி உத்தரவிட்டிருந்தார். மேலும், இவ்வழக்கின் தொடர் விசாரணையில் சிறுமிகளை அழைத்து வந்து உடந்தையாகச் செயல்பட்ட ஜெம் வீரமணியின் ஓட்டுநர்களான லாசர், பார்த்திபன் மற்றும் பாபு ஆகியோரையும் சிறப்பு புலனாய்வுக் குழுவினர் அண்மையில் கைது செய்தனர்.

இந்நிலையில், மற்றொரு பெண் அளித்த புகாரின் பேரில் ஜெம் வீரமணி இன்று சென்னை போக்சோ நீதிமன்றத்தில் நேரில் ஆஜர்படுத்தப்பட்டார். நீதிமன்ற வளாகத்திற்கு அவர் வருகை தந்தபோது, உடல்நலக் குறைபாடு காரணமாகக் கைத்தடியை (வாக்கிங் ஸ்டிக்) ஊன்றியபடி நடந்து வந்தார். அவர் நீதிமன்றத்தில் ஆஜர்படுத்தப்பட்ட நிகழ்வு அப்பகுதியில் பெரும் பரபரப்பை ஏற்படுத்தியது.

ஜெம் வீரமணி மீதான பாலியல் புகார்கள் ஒவ்வொன்றாக வெளிவந்து கொண்டிருக்கும் நிலையில், சிறப்பு புலனாய்வுக் குழுவினர் தங்களது விசாரணையை மேலும் தீவிரப்படுத்தியுள்ளனர். பாதிக்கப்பட்ட பெண்களுக்கு உரிய நீதி கிடைக்கவும், குற்றச் செயல்களில் ஈடுபட்ட அனைவர் மீதும் சட்டப்படி கடுமையான நடவடிக்கை எடுக்கப்பட வேண்டும் என்றும் பொதுமக்கள் மற்றும் சமூக ஆர்வலர்கள் கோரிக்கை விடுத்து வருகின்றனர்.