“உஷார்.. மார்ச் 31-க்குள் இதை செய்யாவிட்டால் உங்கள் கேஸ் மானியம் கட்”.. மத்திய அரசின் அதிரடி அறிவிப்பு….!

மத்திய அரசு சமையல் எரிவாயு நுகர்வோருக்கு மிக முக்கியமான அறிவிப்பு ஒன்றை வெளியிட்டுள்ளது. இதன்படி, அனைத்து கேஸ் சிலிண்டர் பயனர்களும் வரும் மார்ச் 31-ஆம் தேதிக்குள் தங்களது ஆதார் அடிப்படையிலான இ-கேஒய்சி (e-KYC) சரிபார்ப்பை முடிக்க வேண்டியது கட்டாயமாக்கப்பட்டுள்ளது. ஒவ்வொரு நிதியாண்டிலும் ஒருமுறை இந்த செயல்முறையை மேற்கொள்ள வேண்டும் என்றும், நடப்பு 2025-26 நிதியாண்டு முடிவடைவதற்குள் இதனை முடிக்கத் தவறினால் எரிவாயு மானியம் நிறுத்தப்பட வாய்ப்புள்ளதாகவும் அரசு எச்சரித்துள்ளது.

இந்த இ-கேஒய்சி செயல்முறையை மேற்கொள்வது தற்போது மிகவும் எளிதாக்கப்பட்டுள்ளது. நுகர்வோர் தங்களது வீட்டின் வசதியிலிருந்தே ‘ஆதார் பேஸ் ஆர்டி’ (Aadhaar FaceRD) செயலி மற்றும் சம்பந்தப்பட்ட எரிவாயு நிறுவனத்தின் மொபைல் செயலியைப் பயன்படுத்தி முக அங்கீகாரம் (Face Scanning) மூலம் சரிபார்ப்பை முடிக்கலாம். இணைய வசதி இல்லாதவர்கள் அல்லது ஆன்லைனில் செய்யத் தெரியாதவர்கள் தங்களது எரிவாயு விநியோகஸ்தரை நேரடியாகத் தொடர்பு கொண்டோ அல்லது 1800 2333 555 என்ற கட்டணமில்லா எண்ணை அழைத்தோ மேலதிக விவரங்களைப் பெறலாம்.

குறிப்பாக, பிரதான் மந்திரி உஜ்வாலா யோஜனா (PMUY) திட்டத்தின் கீழ் பயன்பெறுபவர்கள் ஆண்டுக்கு 300 ரூபாய் மானியம் பெறுவதற்கு இந்த இ-கேஒய்சி அவசியமானது. ஒருவேளை மார்ச் 31-க்குள் இதனைச் செய்யத் தவறினால், வங்கிக் கணக்கில் மானியத் தொகை வரவு வைக்கப்படுவது நிறுத்தப்படும். இருப்பினும், ஏழாவது சிலிண்டர் வரை மானியம் வழங்கப்படும் என்றும், அதற்குள் கேஒய்சி முடிக்கப்படாவிட்டால் நிதி உதவி முற்றிலும் நிறுத்தப்படும் என்றும் தெரிவிக்கப்பட்டுள்ளது. எனவே, பயனர்கள் கடைசி நேர நெரிசலைத் தவிர்க்க இப்போதே இந்தச் சரிபார்ப்பை முடிக்குமாறு அறிவுறுத்தப்படுகிறார்கள்.