முன்னாள் முதலாளியை பழிவாங்க போலி ரெய்டு…! குழம்பிய தொழிலதிபர்…. சிசிடிவியை அணைத்தும்  சிக்கிய கும்பல்… மும்பையில் வெளிச்சத்திற்கு வந்த அதிர்ச்சி சதி…!!

மும்பை அந்தேரி கிழக்குப் பகுதியில் மருத்துவ உபகரணங்கள் தயாரிக்கும் நிறுவனம் நடத்தி வரும் ராஜ்குமார் கந்தசாமி என்பவரது அலுவலகத்திற்குள் கடந்த ஜூலை மாதம் புகுந்த 9 பேர் கொண்ட கும்பல், தங்களை வருமான வரித்துறை அதிகாரிகள் என அறிமுகப்படுத்திக் கொண்டு சோதனை நடத்துவது போல் நாடகமாடியுள்ளது. ஊழியர்களின் செல்போன்களைப் பறித்து, கேமராக்களை அணைத்துவிட்டு, வரி ஏய்ப்பு செய்திருப்பதாகக் கூறி ரூ.1 கோடிக்கும் அதிகமாகப் பணம் கேட்டு மிரட்டியுள்ளனர். ஆனால், தான் சரியாக வரி செலுத்துவதாகக் கூறி ராஜ்குமார் பணம் கொடுக்க மறுத்துள்ளார்.

அந்தக் கும்பல் கேமராக்களை அணைத்தாலும், காட்சிகளைச் சேமிக்கும் டிவிஆரை அணைக்க மறந்ததே அவர்களைக் காட்டிக்கொடுத்தது. சோதனை முடிந்து ஆவணங்கள் எதுவும் எடுக்காமல் அவர்கள் சென்றதால் சந்தேகமடைந்த ராஜ்குமார், கணக்காளருடன் சென்று விசாரித்தபோது அப்படி ஒரு சோதனையே உத்தரவிடப்படவில்லை என்பது அம்பலமானது. காவல் துறை நடத்திய தீவிர விசாரணையில், ராஜ்குமாரால் வேலையிலிருந்து நீக்கப்பட்ட முன்னாள் ஓட்டுநர் சந்தோஷ் கபட்கர், பழிவாங்கும் நோக்கில் உண்மையான வருமான வரித்துறை ஊழியர்கள் சிலருடன் இணைந்து இந்த போலி ரெய்டை நடத்தியது தெரியவந்தது. தற்போது இந்த வழக்கில் தொடர்புடைய 10 பேரை மும்பை காவல்துறையினர் கைது செய்து தீவிர விசாரணை நடத்தி வருகின்றனர்.