“கொஞ்சம் நகருங்க சாமி..” பெண்கள் கெஞ்சியும் மதிக்காத போலி சாமியார்.. ரயிலில் நடந்த பரபரப்பு சம்பவம்.. வறுத்தெடுக்கும் நெட்டிசன்கள்..!

ஹரித்வாரிலிருந்து டெல்லி நோக்கிச் சென்ற 19020 எண் கொண்ட எக்ஸ்பிரஸ் ரயிலின் பொதுப் பெட்டியில் (General Compartment) போலி சாமியார் ஒருவரின் சுயநலமான செயல், சக பயணிகளிடையே பெரும் கொந்தளிப்பை ஏற்படுத்தியுள்ளது. ரயில் பெட்டி முழுவதும் கால் வைக்கக்கூட இடமில்லாமல், மக்கள் மூச்சுத் திணற நின்றுகொண்டு பயணிக்கும் அளவுக்குக் கூட்டம் அலைமோதியுள்ளது. ஆனால், அங்கு வந்த சாமியார் ஒருவர், பொதுப் பெட்டியின் முழு இருக்கையையும் தனியாக ஆக்கிரமித்து சொகுசாகப் படுத்துக் கொண்டதோடு, தன் பக்கத்திலேயே ஒரு பெரிய பையையும் வைத்துக் கொண்டுள்ளார். முதியவர்கள், பெண்கள், குழந்தைகள் என அனைவரும் நிற்கக் கூட இடமின்றித் தவித்த நிலையிலும், அந்த சாமியார் எதைப் பற்றியும் கவலைப்படாமல் முழு சீட்டையும் பிடித்துக் கொண்டு படுத்திருந்தது சக பயணிகளை முகம் சுளிக்க வைத்துள்ளது.

ரயிலில் கூட்ட நெரிசலில் சிக்கித் தவித்த சில பெண்கள், அந்த சாமியாரிடம் சற்று நகர்ந்து அமருமாறும், தங்களுக்குக் கொஞ்சம் இடம் தருமாறும் பலமுறை கெஞ்சிக் கேட்டுள்ளனர். ஆனால், அந்த போலி சாமியாரோ சிறிதும் இரக்கமின்றி, அவர்களைத் தன் கையால் அசைத்து விரட்டுவதிலேயே குறியாக இருந்தாரே தவிர, தன் இடத்தை விட்டு ஒரு அங்குலம் கூட நகர மறுத்துவிட்டார். சாமியார்கள் என்ற பெயரில் உலா வரும் இதுபோன்ற சில போலி நபர்களின் சுயநலப் போக்கு, ஒட்டுமொத்த சாமியார்களின் பெயரையும் கெடுக்கும் விதமாக அமைந்திருப்பதாக இணையவாசிகள் மற்றும் சக பயணிகள் தங்கள் ஆதங்கத்தையும் கண்டனத்தையும் தெரிவித்து வருகின்றனர்.