இரத்த பரிசோதனைக்கு 300 ரூபாயா..? அரசு மருத்துவமனையில் லஞ்சம் வாங்கிய ஊழியர்.. வைரல் வீடியோவால் கொந்தளிக்கும் இணையவாசிகள்…!!

உத்தரப்பிரதேச மாநிலம் ரேபரேலி மாவட்ட அரசு மருத்துவமனையில், ரத்தப் பரிசோதனை செய்வதற்கு ஏழை மக்களிடம் பகிரங்கமாக லஞ்சம் வாங்கும் அதிர்ச்சி வீடியோ ஒன்று வெளியாகி சமூக வலைதளங்களில் பெரும் கொந்தளிப்பை ஏற்படுத்தியுள்ளது. “மக்களின் ரத்தத்தைப் பரிசோதிக்க, அவர்களின் ரத்தத்தையே உறிஞ்சும் நிலையை பாருங்கள்” என்ற வாசகத்துடன் இந்த வீடியோ வைரலாகி வருகிறது. அரசு மருத்துவமனையில் இலவசமாகச் செய்யப்பட வேண்டிய பரிசோதனைகளுக்கு, அங்கிருக்கும் ஊழியர்கள் சட்டவிரோதமாகப் பணம் வசூலிப்பது அம்பலமாகியுள்ளது.

அந்த வீடியோவில், ரேபரேலி மாவட்ட மருத்துவமனையின் ஆய்வகத் தொழில்நுட்ப வல்லுநரான (Lab Technician) ராஜேஷ் குமார் என்பவர், ரத்தப் பரிசோதனை செய்ய வரும் ஒருவரிடம் வெளிப்படையாக 300 ரூபாய் லஞ்சம் கேட்கிறார். எந்தவித பயமும் இன்றி, முகத்தில் ஒருவித ஏளனச் சிரிப்புடன் அந்தப் பணத்தைப் பெற்றுத் தனது பாக்கெட்டில் வைத்துக் கொள்கிறார். ஏழை எளிய மக்கள் சிகிச்சைக்காக வரும் பொது மருத்துவமனையிலேயே, பட்டப்பகலில் அரங்கேறும் இந்த வசூல் வேட்டை அனைவரையும் அதிர்ச்சியில் ஆழ்த்தியுள்ளது.

“மண்ணுலகின் தெய்வங்கள்” என்று போற்றப்படும் மருத்துவத் துறையினரே இது போன்ற முறைகேடுகளில் ஈடுபடுவது கடும் விமர்சனத்திற்கு உள்ளாகியுள்ளது. ஏழை நோயாளிகளிடம் இருந்து பணத்தைப் பறிக்கும் இத்தகைய ஊழியர்கள் மீது என்ன மாதிரியான கடுமையான நடவடிக்கை எடுக்கப்பட வேண்டும் என்ற கேள்வியுடன் இந்த வீடியோ பகிரப்பட்டு வருகிறது. மருத்துவமனை நிர்வாகமும், மாவட்ட நிர்வாகமும் உடனடியாகத் தலையிட்டு அந்த ஊழியர் மீது கடும் நடவடிக்கை எடுக்க வேண்டும் எனப் பொதுமக்கள் வலியுறுத்தி வருகின்றனர்.