அதிமுக vs தவெக: “கட்சி ஆபீஸையே மூடிட்டாங்களே”… விஜய்யின் ‘வீக்னஸ்’ பற்றி எடப்பாடி போட்ட ஸ்கெட்ச்…!

திருச்சியில் அதிமுக பொதுச்செயலாளர் எடப்பாடி பழனிசாமி செய்தியாளர்களைச் சந்தித்தபோது, தமிழக வெற்றிக் கழகத் தலைவர் விஜய் மற்றும் அவரது அரசியல் செயல்பாடுகளைக் கடுமையாக விமர்சித்துப் பேசினார். விஜய்யின் வரி ஏய்ப்பு விவகாரத்தில் நீதிமன்றம் வழங்கிய தீர்ப்பைக் குறிப்பிட்ட அவர், விஜய் ஒரு ‘ஊழல்வாதி’ என்பது இதன் மூலம் உறுதிப்படுத்தப்பட்டுள்ளதாகச் சாடினார். தூய அரசியல் பேசுபவர்கள் தார்மீக நெறிகளுடன் இருக்க வேண்டும் என்பதே அதிமுகவின் நிலைப்பாடாக உள்ளது.

மேலும், கரூர் சம்பவத்திற்குப் பிறகு விஜய் சுமார் 72 நாட்களாகத் தனது வீட்டை விட்டு வெளியே வராமல் முடங்கிக் கிடந்ததாக எடப்பாடி பழனிசாமி குற்றம் சாட்டினார். ஒரு அரசியல் கட்சித் தலைவர் சவால்களையும் நெருக்கடிகளையும் துணிச்சலுடன் எதிர்கொள்ள வேண்டும் என்றும், ஆனால் விஜய் அஞ்சிக் கொண்டு தனது பனையூர் கட்சி அலுவலகத்தையே 15 நாட்களுக்கு மூடிவிட்டதாகவும் அவர் எள்ளி நகையாடினார்.

முன்னதாக விஜய் அதிமுகவை ‘அடிமைவாத ஊழல் கட்சி’ என்று விமர்சித்திருந்த நிலையில், அதற்குப் பதிலடி கொடுக்கும் விதமாக எடப்பாடி பழனிசாமி இந்தத் தாக்குதலைத் தொடுத்துள்ளார். அரசியல் களம் காணும் முன்பே ஊழல் புகாரில் சிக்கியுள்ள ஒருவரால் தமிழக மக்களுக்கு எவ்வித நன்மையும் ஏற்படப்போவதில்லை என்றும், அவரது அரசியல் வாழ்க்கை தற்போது மிகப்பெரிய பின்னடைவைச் சந்தித்துள்ளதாகவும் அவர் குறிப்பிட்டார்.

இந்த விமர்சனங்கள் அரசியல் வட்டாரத்தில் பெரும் பரபரப்பை ஏற்படுத்தியுள்ளன. இதற்குப் பதிலடி கொடுக்கும் வகையில் தவெக நிர்வாகிகள், கடந்த கால அதிமுக ஆட்சியின் போது நடைபெற்ற தூத்துக்குடி துப்பாக்கிச் சூடு போன்ற சம்பவங்களை முன்வைத்துச் சமூக வலைதளங்களில் எடப்பாடி பழனிசாமிக்கு எதிராகக் கருத்துகளைப் பதிவிட்டு வருகின்றனர். இதனால் அதிமுக மற்றும் தவெக தொண்டர்களிடையே தற்போது வார்த்தை போர் தீவிரமடைந்துள்ளது.