அமெரிக்க ஹெலிகாப்டரை சுட்ட வீழ்த்திய ஈரான்.. கடலில் தத்தளித்த பைலட்டுகளை மீட்ட “இந்தியரின்” ட்ரோன்.. உலகையே மிரளவைத்த மாஸ் சம்பவம்..!!

ஹார்மூஸ் நீரிணைப் பகுதியில் அமெரிக்காவின் அதிநவீன ‘ஏஎச்-64 அப்பாச்சி’ ஹெலிகாப்டர் ஈரான் ராணுவத்தால் சுட்டு வீழ்த்தப்பட்ட சம்பவம் உலகளவில் பெரும் பதற்றத்தை ஏற்படுத்தியுள்ளது. இந்தத் தாக்குதலின் போது ஹெலிகாப்டரில் இருந்து கடலில் குதித்த அமெரிக்க ராணுவத்தின் இரண்டு பைலட்டுகளையும், ‘கார்சேர்’ என்ற அதிநவீன கடல்சார் தன்னாட்சி ட்ரோன் வெறும் 2 மணி நேரத்திற்குள் பத்திரமாக மீட்டு சாதனை படைத்துள்ளது. அமெரிக்க ராணுவ வரலாற்றிலேயே கடலில் தத்தளித்த வீரர்களை மீட்க இத்தகைய தன்னாட்சி கடல் ட்ரோன் பயன்படுத்தப்பட்டது இதுவே முதல்முறையாகும்.

அமெரிக்க கடற்படையின் 5-வது கடற்படைப் பிரிவின் கீழ் இயக்கப்படும் இந்த கார்சேர் ட்ரோன், கடலில் 35 நாட்ஸ் வேகத்தில் செல்லக்கூடியது. சுமார் 450 கிலோ எடையைச் சுமந்து கொண்டு, 1000 நாட்டிக்கல் மைல் தூரம் வரை பயணிக்கும் திறன் கொண்ட இந்த ரிமோட் கண்ட்ரோல் ட்ரோன், ஆபத்தான கடல் சூழலிலும் மனித உதவியின்றி பைலட்டுகள் இருக்குமிடத்தைக் துல்லியமாகக் கண்டறிந்து அவர்களைப் பத்திரமாக மீட்டெடுத்துள்ளது.

அமெரிக்கப் பைலட்டுகளின் உயிரைக் காப்பாற்றி உலகப் புகழ்பெற்ற இந்த கார்சேர் ட்ரோனைத் தயாரித்த பெருமை டெக்சாஸைத் தலைமையிடமாகக் கொண்ட ‘சரோனிக் டெக்னாலஜிஸ்’ (Saronic Technologies) என்ற நிறுவனத்தையே சேரும். இந்த நிறுவனத்தின் இணை நிறுவனராகவும், தலைமை தொழில்நுட்ப அதிகாரியாகவும் பணியாற்றி வருபவர் இந்திய வம்சாவளியைச் சேர்ந்த பிரபல பொறியாளரான விபவ் அல்டேகர் . செயற்கை நுண்ணறிவு மற்றும் கடல்சார் தன்னாட்சி தொழில்நுட்பத்தில் நிபுணரான இவரது கூட்டுத் தயாரிப்பில் உருவான இந்த ட்ரோன், இன்று அமெரிக்க ராணுவ வீரர்களின் உயிரைக் காத்து சர்வதேச அளவில் இந்தியாவின் பெருமையை உயர்த்தியுள்ளது.