“கமலுக்கு 3.. தேமுதிகவுக்கு 8.. காங்கிரஸிற்கு ‘நோ’வா?”….. மிரள வைக்கும் திமுகவின் 164 பிளான்… அறிவாலயத்திலிருந்து லீக்கான ரகசிய லிஸ்ட்….!

2026 தமிழகச் சட்டமன்றத் தேர்தல் களம் இப்போதே சூடுபிடிக்கத் தொடங்கியுள்ள நிலையில், ஆளும் திமுக தலைமையிலான கூட்டணியின் உத்தேசத் தொகுதிப் பங்கீடு குறித்த சுவாரசியமான தகவல்கள் வெளியாகியுள்ளன. ‘மிஷன் 200’ என்ற இலக்குடன் களம் காணும் திமுக, இம்முறை சுமார் 164 தொகுதிகளில் தனித்துப் போட்டியிடத் திட்டமிட்டுள்ளதாகத் தெரிகிறது. கடந்த தேர்தல்களை விட அதிக இடங்களில் உதயசூரியன் சின்னத்தில் போட்டியிட்டு, சட்டமன்றத்தில் தனிப்பெரும்பான்மையுடன் பலமாக அமர வேண்டும் என்பதே அக்கட்சியின் முக்கிய வியூகமாகப் பார்க்கப்படுகிறது.

கூட்டணிக் கட்சிகளைப் பொறுத்தவரை, முக்கியக் கட்சியான காங்கிரஸிற்கு 28 தொகுதிகள் ஒதுக்கப்படலாம் எனத் தகவல் வெளியாகியுள்ளது. மேலும், அண்மையில் திமுக கூட்டணியில் இணைந்த தேமுதிகவிற்கு 7 முதல் 8 இடங்கள் மற்றும் ஒரு ராஜ்யசபா சீட் வழங்கப்பட வாய்ப்புள்ளதாகக் கூறப்படுகிறது. அதேபோல், விடுதலைச் சிறுத்தைகள் கட்சிக்கு 10 முதல் 12 இடங்களும், வைகோவின் மதிமுக மற்றும் இடதுசாரி கட்சிகளுக்கு தலா 5 இடங்களும் ஒதுக்கப்படலாம் என உத்தேசப் பட்டியலில் குறிப்பிடப்பட்டுள்ளது.

மற்றொரு முக்கியக் கூட்டணிக் கட்சியான கமல்ஹாசனின் மக்கள் நீதி மய்யத்திற்கு 3 இடங்களும், மனிதநேய மக்கள் கட்சி மற்றும் முஸ்லீம் லீக் கட்சிகளுக்கு தலா 4 இடங்களும் கிடைக்க வாய்ப்புள்ளது. இது தவிர, கொங்கு மக்கள் தேசிய கட்சிக்கு 2 இடங்களும், எஸ்டிபிஐ கட்சிக்கு 1 இடமும் என மொத்தம் 70 தொகுதிகளைத் தனது கூட்டணிக் கட்சிகளுக்கு திமுக ஒதுக்கத் திட்டமிட்டுள்ளதாகத் தெரிகிறது. இந்த உத்தேசப் பட்டியல் சமூக வலைதளங்களில் பெரும் விவாதத்தை ஏற்படுத்தியுள்ளது.

இருப்பினும், இந்தத் தொகுதிப் பங்கீடு இறுதியானது அல்ல என்றும், காங்கிரஸின் நிலைப்பாடு மற்றும் தேர்தல் நேரத்து அரசியல் சூழலைப் பொறுத்து இதில் மாற்றங்கள் ஏற்படலாம் என்றும் அரசியல் வட்டாரங்கள் தெரிவிக்கின்றன. குறிப்பாக, விஜய் தலைமையிலான தமிழக வெற்றிக் கழகம் களம் காண்பதால், வாக்குகள் சிதறாமல் இருக்க திமுக தனது கூட்டணிக் கட்சிகளைத் திருப்திப்படுத்தும் வகையில் கூடுதல் பேச்சுவார்த்தைகளை நடத்தவும் வாய்ப்புள்ளது. எது எப்படியிருப்பினும், 164 தொகுதிகளில் திமுக போட்டியிடும் பட்சத்தில், அது தமிழக அரசியலில் ஒரு மிகப்பெரிய பலப்பரீட்சையாக அமையும் என்பதில் சந்தேகமில்லை.