“ஒன்று உதயசூரியன்.. இல்லையேல் வெளியே”…. கூட்டணிக் கட்சிகளுக்கு ஸ்டாலின் வைத்த அதிரடி ‘செக்’…. பரபரக்கும் அரசியல் களம்…!

2026 தமிழக சட்டமன்றத் தேர்தலை முன்னிட்டு திமு‌க தனது கூட்டணிக் கணக்குகளைத் தீவிரப்படுத்தி வரும் நிலையில், சிறிய கூட்டணிக் கட்சிகளை ‘உதயசூரியன்’ சின்னத்திலேயே போட்டியிட வைப்பதற்கான வியூகங்களை அக்கட்சித் தலைமை வகுத்து வருகிறது. கடந்த தேர்தலை விட இம்முறை கூடுதல் தொகுதிகளை சில கட்சிகள் கோரி வருவதால், திமுக நேரடியாகப் போட்டியிடும் இடங்களின் எண்ணிக்கை குறையாமல் இருக்க இந்த அதிரடி நடவடிக்கை எடுக்கப்பட்டுள்ளதாகத் தெரிகிறது.

திமுக தலைமையிலான கூட்டணியில் காங்கிரஸ், விசிக, இடதுசாரிகள் எனப் பெரிய கட்சிகள் ஒருபுறம் இருந்தாலும், ம.தி.மு.க, கொ.ம.தே.க, த.வா.க, இந்திய யூனியன் முஸ்லிம் லீக் போன்ற கட்சிகளும் இடம்பெற்றுள்ளன. இந்தக் கட்சிகளின் வேட்பாளர்களை உதயசூரியன் சின்னத்தில் போட்டியிட வைப்பதன் மூலம், திமுகவின் மொத்தத் தொகுதிகளின் எண்ணிக்கையை சுமார் 180 வரை உயர்த்த அறிவாலயம் திட்டமிட்டுள்ளது. இது கட்சியின் பலத்தை சட்டமன்றத்தில் உறுதிப்படுத்த உதவும் என்பது தலைமையின் கணிப்பு.

தனிச் சின்னத்தில் போட்டியிட விரும்பும் கட்சிகளுக்கு இது ஒரு சவாலான சூழலை உருவாக்கியுள்ளது. உதயசூரியன் சின்னத்தில் நின்றால் வெற்றி வாய்ப்பு அதிகரிக்கும் என்றாலும், தங்கள் கட்சியின் தனித்துவமான அடையாளம் பாதிக்கப்படுமோ என்ற கவலை அந்தந்தக் கட்சித் தலைவர்களிடையே நிலவுகிறது. இருப்பினும், “விருப்பமிருந்தால் நில்லுங்கள், இல்லையென்றால் விடைபெறுங்கள்” என்ற ரீதியிலான கறாரான அணுகுமுறையை திமுக கையாண்டு வருவதாக அரசியல் வட்டாரங்கள் தெரிவிக்கின்றன.

தற்போது தொகுதிப் பங்கீடு தொடர்பான முதற்கட்ட ஆலோசனைகள் நடைபெற்று வரும் வேளையில், திமுகவின் இந்த நிபந்தனை கூட்டணிக் கட்சிகளிடையே சலசலப்பை ஏற்படுத்தியுள்ளது. குறிப்பாக, தேர்தல் அறிக்கை தயாரிப்பு மற்றும் தொகுதிப் பங்கீட்டுக் குழுக்கள் அமைக்கப்பட்டுள்ள நிலையில், இந்த சின்னம் குறித்த அழுத்தம் இறுதிக்கட்டப் பேச்சுவார்த்தையில் எந்த மாதிரியான மாற்றங்களை ஏற்படுத்தும் என்பதை அரசியல் நோக்கர்கள் உன்னிப்பாக கவனித்து வருகின்றனர்.