“குரங்கு போல 7 கட்சி தாவியவர்”…. நிர்மல்குமாரை நாறடித்த திமுகவின் ஆ.ராசா…. சூடான சைதாப்பேட்டை மேடை… பரபரப்பு பேச்சு….!

தமிழக அரசியலில் திமுக மற்றும் தமிழக வெற்றிக் கழகம் இடையே கருத்து மோதல்கள் தீவிரமடைந்துள்ள நிலையில், சென்னையில் நடைபெற்ற ஆர்ப்பாட்டத்தில் திமுக துணைப் பொதுச் செயலாளர் ஆ.ராசா எம்பி பேசிய பேச்சு பெரும் விவாதப் பொருளாக மாறியுள்ளது. தமிழக சட்டப்பேரவையில் திமுக தலைவர் ஸ்டாலின் குறித்து சர்ச்சைக்குரிய கருத்துகளைத் தெரிவித்த முதல்வர் விஜய்யைக் கண்டித்து, தமிழ்நாடு முழுவதும் திமுக சார்பில் கண்டன ஆர்ப்பாட்டங்கள் நடத்தப்பட்டன. சென்னை சைதாப்பேட்டையில் நடைபெற்ற நிகழ்வில் பங்கேற்ற ஆ.ராசா, மாற்று முகாமில் உள்ள நிர்வாகிகளையும், திமுக மீதான விமர்சனங்களையும் கடுமையாகச் சாடினார்.

தவெகவில் இணைந்துள்ள நிர்வாகிகளின் பின்னணி குறித்துப் பேசிய ஆ.ராசா, “குரங்கு போல கட்சிக்கு கட்சி தாவியவர் நிர்மல்குமார். 7 கட்சி தாவி இங்கு வந்து உட்கார்ந்திருக்கிறார்” எனக் காட்டமாக விமர்சித்தார். திமுக ஆட்சியில் ஏதேனும் நடந்தால் அதைச் சட்ட ஒழுங்குப் பிரச்சனை என விமர்சிப்பவர்கள், தவெகவில் நடக்கும் நிகழ்வுகளைத் தனிமனித ஒழுக்கம் எனக் கூறுவது என்ன மாதிரியான அதிபுத்திசாலித்தனம் என்றும் கேள்வி எழுப்பினார். மேலும், மிசா சட்டத்தைப் பற்றி அவதூறு பரப்புபவர்கள் கி.வீரமணி, தியாகு போன்ற மூத்த தலைவர்களிடம் கேட்டுத் தெரிந்துகொள்ள வேண்டும் என அறிவுறுத்தினார்.

மிசா காலத்துக் கொடுமைகளையும் அப்போதைய மு.க. ஸ்டாலினின் தியாகத்தையும் நினைவுகூர்ந்த ஆ.ராசா, நாடாளுமன்றத்தில் தான் பதிவு செய்த நிகழ்வொன்றைப் பகிர்ந்து கொண்டார். 23 வயதில் திருமணமாகி சில மாதங்களிலேயே கைது செய்யப்பட்டு, சித்திரவதைக்கு உள்ளாக்கப்பட்ட மு.க. ஸ்டாலின், தன்னைச் சந்திக்க வந்த தந்தையிடம் தனது காயங்களைப் பொருட்படுத்தாமல், “நாட்டின் ஜனநாயகத்தைக் காப்பாற்றுங்கள்” என்று கூறிய வீரம் செறிந்த வரலாற்றை எடுத்துரைத்தார். தென்னாப்பிரிக்க விடுதலைப் போராட்டக் கவிஞர் பெஞ்சமின் மொலாய்ஸின் வரலாற்றுச் சம்பவத்துடன் இதனை ஒப்பிட்டு, நாடாளுமன்றத்தில் தான் பேசியபோது எந்தவொரு தலைவரும் அதை மறுக்கவில்லை என்பதை சுட்டிக்காட்டினார்.

தமது உரையின் நிறைவில், நாடாளுமன்ற நிகழ்வுக்குப் பிறகு நடந்த சுவாரசியமான சம்பவத்தையும் அவர் குறிப்பிட்டார். அவையை விட்டு வெளியே வந்தபோது, பிரியங்கா காந்தி தன்னை அணுகி, “நீங்கள் கூறிய தகவல்கள் அனைத்தும் உண்மையா? ஸ்டாலின் அங்கிளுக்கு இப்படி ஒரு கொடுமை நடந்ததா?” என வியப்புடன் கேட்டறிந்ததை நினைவு கூர்ந்தார். மு.க. ஸ்டாலின் சந்தித்த தியாகங்களையும், மிசா கொடுமைகளின் கொடூரத்தையும் அறியாமல் தவெக தலைவர்கள் பேசி வருவதாகக் குறிப்பிட்ட ஆ.ராசா, திமுகவின் வரலாற்றையும் தியாகத்தையும் யாராலும் கொச்சைப்படுத்த முடியாது என ஆவேசமாகப் பேசி தனது உரையை முடித்தார்.