“சுதந்திர தின விழாவில் திரிஷா… எங்கே போகிறது நாடு?”…. கையெழுத்துப் போட்ட கையோடு திமுக MLA பரபரப்பு பேச்சு….!

தூத்துக்குடி மாவட்ட காவல் கண்காணிப்பாளர் அலுவலகத்தில் உள்ள மாவட்ட குற்றப்பிரிவு அலுவலகத்தில், நீதிமன்ற நிபந்தனைப்படி தனது இறுதிநாள் கையெழுத்தைப் பதிவு செய்த பின், விளாத்திகுளம் தொகுதி திமுக சட்டமன்ற உறுப்பினர் மார்க்கண்டேயன் செய்தியாளர்களைச் சந்தித்துப் பேசினார். தமிழக முதல்வர் குறித்து அவதூறு மற்றும் மிரட்டல் விடுக்கும் வகையில் பேசிய வழக்கில் கைது செய்யப்பட்டு ஜாமீன் பெற்ற அவர், தினமும் ஆஜராகி கையெழுத்திட வேண்டும் என்ற நீதிமன்ற உத்தரவை நிறைவு செய்த கையோடு இந்த விளக்கத்தை அளித்திருந்தார்.

செய்தியாளர்கள் சந்திப்பில் பேசிய மார்க்கண்டேயன், சுதந்திர தின விழாவில் நடிகை திரிஷா கலந்து கொண்டது குறித்த விமர்சனங்களுக்குப் பதிலளித்தார். “சுதந்திர தின விழாவில் நடிகை திரிஷா பங்கேற்றதைச் சுட்டிக்காட்டி, இந்த நாடு எங்கே போய்க்கொண்டிருக்கிறது என்ற கேள்விகள் எழுப்பப்படுகின்றன. தலைமைப் பொறுப்பில் இருப்பவர்கள் இனிவரும் சந்ததியினருக்கு நல்லதொரு முன்னுதாரணமாக இருக்க வேண்டும் என்பதே எனது கருத்து” என்று அவர் வலியுறுத்தினார்.

மேலும், பாஜக தலைவர் நயினார் நாகேந்திரனின் கருத்துக்கள் குறித்துப் பேசிய அவர், “சட்டமன்றத்தில் நயினார் நாகேந்திரனை நான் பார்த்திருக்கிறேன். கட்சி எல்லைகளைத் தாண்டி சட்டமன்றத்திற்குள் அவர் நாகரிகமாகவே பேசியுள்ளார். தான் நாகரிகமாகத்தான் பேசியதாக அவரும் தெரிவித்துள்ள நிலையில், அவரது கருத்தைப் பெரிதுபடுத்தத் தேவையில்லை. இதில் கூறப்பட்டுள்ளது மிகவும் யதார்த்தமான ஒரு விஷயம் தான்” என்று குறிப்பிட்டார்.

வழக்குகள் மற்றும் மக்கள் மன்றம் குறித்துப் பேசுகையில், “என்னை வழக்கு போட்டு யாரும் அலைக்கழிக்கவில்லை; இதையெல்லாம் ஒரு அலைக்கழிப்பாகக் கருத முடியாது. இத்தகைய நிகழ்வுகளை மக்கள் பார்த்துக் கொண்டுதான் இருக்கிறார்கள், அவர்களே கேள்வியும் எழுப்புவார்கள். எந்தச் சம்பவமும் நடக்காமல் அனைவரும் புத்தராகவே இருந்துவிட்டால் அவர்களின் யோக்கியதையை எப்படி அறிவது?” என்று கேள்வி எழுப்பினார். இறுதியாக, சட்டமன்ற உறுப்பினர்களுக்கு கார் வழங்குவது தொடர்பான கேள்விக்கு, முழுமையான அரசாணை வந்த பிறகே அதுகுறித்து கருத்து தெரிவிக்க முடியும் என்று கூறி உரையை நிறைவு செய்தார்.