“விஜய் கொடுத்த அடுத்த ‘அதிர்ச்சி வைத்தியம்’.. கொத்து கொத்தாக மாறும் நிர்வாகிகள்”.. சம்பவம் செய்யும் செங்கோட்டையன்… கலக்கத்தில் அறிவாலயமும், எடப்பாடியும்…!

தமிழக அரசியல் வரலாற்றில் யாரும் எதிர்பாராத திருப்பமாக, கட்சி தொடங்கிய இரண்டே ஆண்டுகளில் தமிழக வெற்றிக் கழகத்தின் தலைவர் விஜய் ஆட்சியைப் பிடித்து முதல்வராக அரியணை ஏறியுள்ளார். 1967 முதல் தமிழகத்தை மாறி மாறி ஆட்சி செய்து வந்த இருபெரும் திராவிடக் கட்சிகளான திமுக மற்றும் அதிமுகவை தற்பொழுது எதிர்க்கட்சி வரிசையில் அமர வைத்து ஒட்டுமொத்த அரசியல் களத்தையும் அதிர வைத்துள்ளார் விஜய். இந்த இமாலயத் தோல்வியின் அதிர்ச்சியில் இருந்து மீள முடியாமல், திமுக தோல்விக்கான காரணங்களை ஆராய குழு அமைத்து ஆலோசித்து வருகிறது; மறுபுறம், அதிமுகவின் எம்.எல்.ஏக்கள் இரு பிரிவுகளாகப் பிரிந்து தத்தளித்து வருகின்றனர்.

இந்தத் தோல்வி அதிர்ச்சியில் இருந்து திராவிடக் கட்சிகள் மீள்வதற்குள், முதல்வர் விஜய் தலைமையிலான தவெக அடுத்த அதிரடி வைத்தியத்தைப் பார்க்கத் தொடங்கியுள்ளது. தமிழகத்தில் விரைவில் உள்ளாட்சித் தேர்தல் வரவிருக்கும் சூழலில், தவெகவின் அடுத்தடுத்த அரசியல் நகர்வுகள் திமுக, அதிமுக நிர்வாகிகளின் தூக்கத்தைக் கெடுத்துள்ளது. சட்டசபைத் தேர்தல் வெற்றியின் தொடர்ச்சியாக, தற்போது திராவிடக் கட்சிகளின் முக்கிய நிர்வாகிகளைத் தன்பக்கம் இழுக்கும் அதிரடிப் படலத்தை தவெக தீவிரப்படுத்தியுள்ளது.

இதன் காரணமாக, சென்னை முதல் கன்னியாகுமரி வரை திமுக மற்றும் அதிமுகவைச் சேர்ந்த நிர்வாகிகள் பலரும் தவெகவில் ஐக்கியமாகி வருகின்றனர். குறிப்பாக, திராவிடக் கட்சிகளின் கோட்டையாகக் கருதப்படும் கொங்கு மண்டலத்தில் இந்த கட்சித் தாவல் மிகத் தீவிரமாக அரங்கேறி வருகிறது. ஈரோடு மற்றும் நாமக்கல் மாவட்டங்களைச் சேர்ந்த திமுகவின் முக்கியப் பொறுப்பாளர்களும், சேலம் உள்ளிட்ட மாவட்டங்களைச் சேர்ந்த அதிமுகவின் முக்கிய நிர்வாகிகளும் தவெகவில் இணைந்து வருவது இரு கட்சிகளின் தலைமைக்கும் பெரும் தலைவலியை ஏற்படுத்தியுள்ளது.

சட்டசபைத் தேர்தல் அலையோடு, உள்ளாட்சித் தேர்தலிலும் தவெக இதேபோன்றதொரு பிரம்மாண்ட வெற்றியைப் பெற்றுவிடும் என்று அடிமட்ட நிர்வாகிகள் பலரும் நம்புகின்றனர். இதன் காரணமாகவே, ஆளும்கட்சியை நோக்கி நிர்வாகிகளின் நகர்வு அதிகமாக உள்ளதாகக் கூறி திமுக, அதிமுகவினர் புலம்பி வருகின்றனர். உள்ளாட்சித் தேர்தல் நெருங்க நெருங்க இந்த எண்ணிக்கை மேலும் அதிகரிக்கும் என்பதால், அடுத்தகட்டமாகத் தவெக கொடுக்கப் போகும் அதிர்ச்சிகளை எதிர்கொள்ள முடியாமல் திராவிடக் கட்சிகள் கடும் கவலையில் ஆழ்ந்துள்ளன.