‘கைவிட்ட’ தவெக… ‘கைக்கோர்க்கும்’ அதிமுக…. முன்னாள் அமைச்சர்களின் மாஸ்டர் பிளான்… CM விஜய்க்கு அடுத்தடுத்து காத்திருக்கும் ஷாக்….!

அதிமுகவில் இருந்து விலகி தமிழக வெற்றிக் கழகத்தில் இணைந்த முன்னாள் அமைச்சர்கள் சிலர், கட்சி நிர்வாகத்தில் தங்களுக்குத் தேவையான முக்கியத்துவமும் பதவிகளும் கிடைக்காததால் கடும் அதிருப்தியில் இருப்பதாகத் தகவல்கள் வெளியாகியுள்ளன. செம்மலை, உடுமலை ராதாகிருஷ்ணன், எம்.சி. சம்பத், வெல்லமண்டி நடராஜன், கடம்பூர் ராஜூ மற்றும் வைகைச்செல்வன் உள்ளிட்ட முக்கிய நிர்வாகிகள், தவெகவில் தங்களின் அரசியல் எதிர்காலம் கேள்விக்குறியாகியிருப்பதாக உணர்வதாகக் கூறப்படுகிறது. புதிதாகத் தொடங்கப்பட்ட கட்சியில் எதிர்பார்த்த அளவுக்குத் தலைமை அங்கீகாரம் வழங்காததால், மீண்டும் தங்களது பழைய தாய்க்கட்சியான அதிமுக பக்கமே திரும்பிச் சென்றுவிடலாமா என இவர்கள் தீவிரமாக ஆலோசித்து வருவதாக அரசியல் வட்டாரங்களில் பரவலாகப் பேசப்படுகிறது.

மறுபுறம், கட்சியை மேலும் வலுப்படுத்தும் நோக்கில், அதிமுகவில் இருந்து விலகி மாற்றுக்கட்சிகளுக்குச் சென்ற மூத்த தலைவர்கள் மற்றும் நிர்வாகிகளை மீண்டும் அதிமுகவிலேயே இணைப்பதற்காக எடப்பாடி பழனிசாமி சிறப்புத் தலைவர்கள் அடங்கிய குழு ஒன்றை அமைத்துள்ளதாக ஏற்கெனவே செய்திகள் வெளியாகியிருந்தன. இந்தக் குழுவின் வருகையும், அதிமுக தலைமையின் இந்தச் சாதகமான நடவடிக்கையும் தவெகவில் அதிருப்தியில் இருக்கும் முன்னாள் அமைச்சர்களுக்கு மீண்டும் அதிமுகவிற்குத் திரும்புவதற்கான நல்வாய்ப்பாக அமைந்துள்ளது. இதனால், வரும் நாட்களில் தமிழக அரசியல் களத்தில் முக்கியக் கட்சித் தாவல்கள் மற்றும் மாற்றங்கள் நிகழக்கூடும் என எதிர்பார்க்கப்படுகிறது.